E porta ku Baoase - potrèt: Deya Mensche

E porta ku Baoase – potrèt: Deya Mensche

WILLEMSTAD – Despues ku tabatin basta werewere rònt di e porta ku Baoase a poné riba kaminda públiko di Drielstraat, i ku porsierto a ser kita riba òrdu di ROP of Servisio pa Planifikashon Urbano – antes DROV, tin indikashon ku ainda e resort luhoso no ta kumpliendo ku tur rekisito legal. Segun Abogado Achim Henriquez, Baoase a skùif e hekinan infraktor riba tereno ku a ser di dèmpel ilegalmente, pero ku ineksplikabelmente a haña permit di konstrukshon di DROV i Domeinbeheer.

E estado di e bich ta unu deplorabel, unda ainda staka nan di heru ta sala fo’i awa i un boka di kloaka relativamente nobo, ta hasiendo esaki inusabel. Minister di Transporte, Tráfiko i Planifikashon Urbano, Suzy Camelia-Römer, ta spera di pronto haña e rapòrt di SOAB, kende ta investigando e legalidat di e proseso di pèrmit, i ta di opinion ku esun ku a susha e bich, mester drech’é den e estado original.

Deya Mensche ta papia ku abogoda Achim Henriquez i minister Camelia-Römer

Según Abogado Henriquez e problema ta sinta den funshonamentu defisiente di e aparato, spesífikamente ROP antes DROV, kende despues di 10-10-’10 a atkerí hopi persona inkapasitá den e top kader di su maneho. “Durante e maneho di èks minister Charles Cooper, kosnan a bai di drástikamente malu, unda a apunta kompinchinan polítiko den e puestonan konserní”, Henriquez a alega.

Fraude
Spesífikamente ta kuestioná e nominashon di e aktual hefe di sektor di ROP/DROV i direktor interino di CCAA, Caroline González Manuel, kende a ser apunta na 2011 pa Cooper. Apesar di tur spekulashon di fraude rònt di su persona, banda di su funshon na airopuerto, González Manuel, ainda ta enkargá ku otorgamentu di permisonan di konstrukshon, outorisashon pa desaroyo di proyektonan i atkisishon.

Según investigashonnan ku a ser hasí pa korant Amigoe na 2014, fo’i dje tempu ei a ser indiká inadekuashon sistemátiko den otorgamentu di pèrmit. Spesífikamente a kubri e kaso di e kompleho di apartamentu na Pietermaai ekstensivamente, pero no a investiga funshonamentu di e señora ni di e aparato.

Camelia - Romer & Caroline Gonzalez Manuel - foto: Knipselkrant Curacao

Suzy Camelia-Römer i Caroline Gonzalez Manuel – foto: Knipselkrant Curaçao

Cooper di su partí a refuta e insinuashonnan di abogado Henriquez severamente i a splika ku no ta e minister ta disidí ken ta sinta riba kua puesto. “Tin un prosedura di aplikashon habri ku nos a kana, unda dos kandidato a keda selektá, i ku esaki a bai gabinete pa nomina esun mas kapas.”

Alabes, e èks minister a splika ku un minister por ta responsabel finalmente, pero e ta duna mandato na hefenan di e aparato pa otorgá pèrmit. “Ora bo nomina un hende, bo no sa antemano ku e ta korupto of no, i si e rapòrt (di SOAB) indiká iregularidat, mester a retira e mandato i persiguí esnan kulpabel”, Cooper a deklará.

Pèrmit di konstrukshon
Minister Suzy Camelia–Römer a indiká ku Domeinbeheer ta kabando e investigashon riba e proseso di pèrmit di konstrukshon di Baoase i tambe SOAB, kende ta investigando e asuntu di Pietermaai. Camelia–Römer ta kere ku niun minister por traha sin mandato paso e aparato ta muchu grandi, i si retira esaki, tur kos lo pega mirando e magnitut di pèrmit ku ta keda pidi i prosesá. “Si algu a bai robes prosedural of ta un persona a hasi algu robes humanamente, mester atendé esaki korektivamente”, e minister a splika.

Camelia – Römer a enfatisá ku promé ku husga, SOAB i Domeinbeheer mester konkluí nan investigashon, ku e ta spera di haña den e siman benidero, pa asina e por tuma akshon.

Outor Deya Mensche