Liemarvin Bonevacia, Terrence Agard i Churandy Martina na SDK – Deya Mensche
WILLEMSTAD – Ayera Fundashon Desaroyo Deportivo Kòrsou a organisá un Sport-A-Thon pa rekoudá fondo pa renobashon di Sentro Deportivo Kòrsou. Durante 12 ora a purba di rekoudá 1 mion florin pa renoba e kompleho deportivo. Streanan di atletismo manera Churandy Martina, Terrence Agard, Liemarvin Bonevacia, i Hensley Paulina tabata presente pa anima e públiko i e komunidat di Kòrsou pa hasi donashon.
Tambe públiko tabatin e oportunidat pa dùnk nan personahe faborito den un tanki di awa, a kambio di un generoso donashon. Bou di hopi harimentu e flamante èks reina di deporte i ko-anfitrion di e dia, Jadira Bislick, a anima, entre otro lider polítiko di PAIS, Alex Rosaria, i atleta Churandy Martina pa ‘bah’e na awa’. Tambe Terrence Agard i Liemarvin Bonevacia a sinta riba e stul temibel di e tanki, pa asina rekoudá fondo pa SDK.
“SDK ta manera un segundo kas p’ami”, Churandy Martina a splika. E estrea internashonal di atletismo a konta kon ela kuminsá kore riba kanchanan di SDK fo’i su nuebe aña. “Mi tambe ke duna di mi parti pa drecha e kompleho deportivo pa asina más mucha por hasi uso di esaki”, ela kompartí.
Terrence Agard a kompartí kon ela praktiká varios deporte na SDK manera natashon i atletismo, i asta gemnastik komo kuríkulo di skol. “Mi ta kere ku hóbennan lokal mester por trein den un fasilidat deportivo ku ta kumpli ku estandardanan internashonal pa asina nan por penetra i kompetí riba nivel mundial”, ela splika.
Liemarvin Bonevacia, tambe ta haña ta hopi importante pa sostené SDK finansieramente, paso e ta haña esaki indispensabel pa adelanto di desaroyo deportivo di nos isla.
Gerrit Schotte i Thakaidzwa Doran – Deya Mensche
Varios lider polítiko a asi uso di e oportunidat akí, pa hasi donashonnan generoso of duna opsekionan balioso pa bende riba e wepsait di Curabits. Akí públiko por hasi un oferta riba kualke artíkulo disponibel i esun ku hasi e donashon mas grandi ta gana. Ainda ta posibel pa atkerí diferente artíkulo i premio.
Tambe tabatin aktuashonnan musikal di e tan popular SQUAD, kende a presenta hitnan manera T’abo Mi Ke, Bodi Ta 100 i Felis Mane Mi Ta. “Ami a usa e kompleho di SDK te na grandi, ya ku mi tabata hungá den promé divishon di futbol”, kantante Dopie Keyz a splika. Despues ERA i Gents tambe a deleita públiko ku un tremendo presentashon. Adishonalmente tabatin varios wega i bouncer pa entretené e muchanan.
Positivo
Según Thakaidzwa Doran, direktor di FDDK, e evento a kreá un konsientisashon nobo pa deporte den nos komunidat. Na final, 75.567,69 florin a keda rekoudá, ainda leu fo’i di e 1 mion florin ku a keda proyektá. “E kaminda pa éksito no ta unu asfalta, pero e ta un komienso positivo”, ela agrega.
Outor Deya Mensche