Un señora ta tene bandera arubano duru durante di akshonnan di protesta na Den Haag miéntras Mobiele Eenheid ta pará kla pa bari tur hende for di den kaya – potrèt di archivo: John Samson
DEN HAAG – Bou di arubanonan den e region di Den Haag e reakshonnan tabata miksto riba e desishon di Ministerio Públiko (OM) den e kaso di Mitch Henriquez. OM ta bai pèrsiguí dos di e sinku polisnan sospechoso. Henriques a fayesé na yüni di 2015 durante un detenshon den Zuiderpark na Den Haag.
E arubano Judith de Vries ta haña ku mester pèrsiguí tur sinku polis. :Nan tabata t’ei i nan por a papia ku nan koleganan. E ora ei bo ta kómplise, mi ta haña. Kisas nan por haña ménos kastigu”
Joyce Bikker, tambe di desendensia arubano, por komprondé e desishon di OM si. “Mi ta sali for di punto di bista ku nan a investigá bon, i na final mi ta konfia e sistema di hustisia. Mi ta komprondé e emoshon, pero mi ta pará poko mas leu di e kaso.
Tiner
Via fundashon Centrum Bikker ta duna lès na tiner den henter Den Haag, entre otro den Schilderswijk. Esakinan a borotá den klas despues di morto di Henriquez i e protestanan ku a sigui. Bikker: No tur, pero mi a tende hopi reakshon negativo tokante polis, pero tambe tokante e hasidónan di bochincha. Hopi ta reakshoná for di nan sintimentu. Mi ta trata di papia ku nan tokante di esaki i pone e echonan banda di otro. Kiko a sosodé eksaktamente i di kiko ta trata?”
Deskonfiansa
E protestanan despues di Henriquez su morto ta habri un problema. E reproche: polis ta trata hulandesnan diferentemente a base di nan desendensia. E miembro di konseho di Den Haag Fatima Faïd a bisa djis despues di morto di Henriquez ku violensia di polis i rasismo ta un issue grandi den siudat
Bikker: “Despues di Mitch su morto tabatin protesta. Nan tabata kansa di violensia di polis i e deskonfiansa entre hóbennan i polis. Un sierto kantidat di alumno den e bario, mi ta tende espesialmente hóbennan ku un etnisidat no hulandes, tabata sinti nan mes diskriminá. Ta masha piká ku e bochinchanan tabata kita e relevansia di e protestanan.”
Ellen Rosina, añanan largu dosente na un skol di vmbo na Den Haag, tin bia ta sinti su mes no seif ora tin polis den bario. “No ora no tin nada, ma mi ta sinti mi no seif ora mi ta un kaminda ku sí tin algu ta sosodé. Poko tempu ei tabatin un bochincha den siudat. E ora ei polis no ta wak solamente esnan envolví sino tur hende den e bario. Mi a drenta un pakus masha lihé. E ora ei si mi mester a pensa riba Mitch.”
Kombersashon
E pregunta tabata kon ta sigui awor entre polis i bario. “Polis ta kombersá si despues di e insidente, esei mi ta haña bon. Espesialmente e polisnan di bario a pasa na skolnan. Nan mester mantené e diálogo. Awor ta manera hóben ta haña ku no ta skucha nan. Esaki ta un diskushon ku tin basta tempu kaba”, Bikker ta bisa.
Rosina: “Aña pasá hende di polis tabata bin papia na skol tokante e insidente. Algun hende tabata bisa: ta bon nan t’ei, pero e manera ku nan ta trata ku hende no ta bon. Tin bia nan ta hasi di mas, tin bia ku hopi violensia, sin sa bon ta kiko a pasa. Un polis e dia ei a splika hopi, pero tòg bo tabata mira mes ora pakiko e kosnan aki ta sosodé. Masha hopi hende ta mira nan komo enemigu, miéntras ku nan mester defendé nos.”
Vries: “Nan mester mihó edukashon. Polis mester papia ku e agentenan internamente tambe riba e kosnan ku nan a hasi malu. Bo no tin nodi di tuma tur kos tampoko. Ma mi ta spera si ku nan ta stòp di hinka hende den hòki.”
Outor Pieter Hofmann