Jannuel Rosina i e brassband ta warda e parada di diversidat Ieder 1 na Amstelstation na Amsterdam – potrèt: Pieter Hofmann
AMSTERDAM – “Tin bia sí, tin bia nò.” Na palabra e antiano Miqi Jansen (27) ora puntré si e ta sinti ku Hulanda ta di dje tambe.
Ora un antiano kometé un krímen, esaki ta haña mas atenshon den medionan di komunikashon ku ora e malechor ta un hulandes blanku, e ta haña. E ora ei ta djis ‘Piet a hasi tal’ anto ta kla. Si ta un alóktono e notisia ta keda plak mas largu. Na e tipo di momentonan ei Hulanda no ta di mi.”
Meskos ku míles di otro hende ayera na Amsterdam el a subi kaya pa ekspresá su mes pro diversidat i konekshon den komunidat hulandes. E marcha a sali di Amsterdam Arena bai Museumplein kaminda a tene e manifestashon Ieder 1 (1 i tur).
Miqi no ta e úniko antiano ku a kana den e marcha. Jannuel Rosina (25) di Schagen tambe ta den públiko. Rosina a nase na Kòrsou i e ta lider di un konhunto musikal ku pa okashon di e dia ta forma un brassband. Jannuel ta mas positivo ku Miqi si ta trata di su posishon komo hulandes antiano.
Jannuel: “Mi ta biba na Schagen, no ta un pueblo kaminda tin hopi hende manera ami ta biba, pero mi ta sinti mi na kas. Ora mi kana den sentro mi no ta sinti mi diferente òf algu asina.”
Jannuel tin bon speransa tambe di e efekto di e manifestashon: “MI ta haña bunita pa mira kon tur hende ta kana huntu pa laga skucha un bos i pa mustra un moketa. Mi ta kere Hulanda mester di esaki.”
Krítika
No ta tur hende ta di akuerdo ku Jannuel. Di antemano tin hopi krítika riba e manifestashon. Derechistanan populista ta haña ku ta ko’i kèns polítikamente korekto. Algun aktivista antirasista ta sinti manera Ieder 1 ta krea un konekshon falsu pero no ta kontribuí na e solushon di asuntunan manera rasismo i eksklushon.
Tambe tin duda si e idea positivo di Ieder 1 tin efekto. Jannuel: “Mi no sa si lo yuda, òf si esaki lo trese e kambio. Pero ta un komienso nèchi si.” Su kompañero di den e banda Mohamed, binidero di Guinee, ta mas tristu: “Mi ta bisa bo frankamente: ami ta kere ku nò, ta djis pa show.”
Jannuel Rosina i su brassband den akshon na e parada di diversidat Ieder 1 na Amsterdam – potrèt: Pieter Hofmann
Mensahe
Mayoria di e miembronan di e banda no ta interesá den e mensahe di e parada di diversidat, nan mes ta bisa. Nan tin gana di hasi muzik ku nan amigunan i kontribuí na e fiesta. Nan ta logra esaki: asina e hóbennan kuminsá bati e tambúnan, i Jannuel kuminsá dirigí ku su mannan i su flùit, henter e públiko pareu ta bira wak nan. Ora nan kaba di toka nan ta haña gritamentu i aplouso.
Pero kiko tin di selebrá, mirando e mensahenan negativo kontra ‘e otronan’? Jannuel: “MI ta kere semper tin algu di selebrá. Bo ta mira ku e medionan di komunikashon ta trese negatividat so dilanti, pero ta nèt p’esei nos mester tuma nos punto di bista i trese positividat dilanti.”
Miqi ta ripití su punto di bista. Konforme: “Negatividat semper lo keda.”
Outor Pieter Hofmann