Bob Pinedo na e enkuentro di informashon | Potrèt: Dick Drayer

Bob Pinedo na e enkuentro di informashon | Potrèt: Dick Drayer

WILLEMSTAD – Diessinku porshento di un mil hende muhé ku for di promé di yüli a skrin pa HPV ta positivo. Esta: nan ta karga e viro ku ta kousa kanser na garganta di matris.Esaki Ethel Bynoe, enfermera di Fundashon Prevenshon, ta bisa. E fundashon aki di profesor dr. Bob Pinedo ta ehekutá un skrinen nashonal pa por detektá kanser di garganta di matris trempan.

For di e zomer aki 57 mil hende muhé na Kòrsou ta haña un yamada pa laga skrin nan mes riba e viro papiloma humano (HPV). Bynoe sa ku dos porshento di hende muhé den área karibense tin kanser di garganta di matris. “Esaki ta haltu. Ta e di dos kousa di morto serka hende muhé riba e islanan.

Dick Drayer ta kombersá ku Sharon de Maaier, ku a bini e enkuentro di informashon

Yamada
Fundashon Prevenshon a haña plaka di gobièrnu pa pone un sistema di yama hende pa skrinen i pa skrin dies mil hende muhé. Lo no alkansá e kantidat aki si no aserká e hende muhénan aktivamente.”Un yamada den pòst no ta un garantia ku e muhénan lo bini” Bynoe ta bisa.

Pa e motibu ei e Fundashon di Pinedo ta organisá e enkuentronan di informashon huntu ku dòkternan di kas. Pa yama e muhénan bini ei mes, sin warda e karta, sino pa bini mésora. Ora e por, Bob Pinedo mes tambe ta bini e enkuentronan.

Kòrsou ta dilanti
“Nos ta kana dilanti na Kòrsou”, Louise Elstak, direktor di e fundashon ta bisa. “Aki nos no ta hasi solamente e PAP-tèst manera na Hulanda. Esei ta wak e sèlnan desviante, e sèlnan di kanser. Nò, aki nos ta hasi e tèst di HPV tambe, ku ta wak si bo ta karga e viro ku ta kousa e enfermedat.

“Ta asina fásil pa trata e enfermedat, ku pa deskubrié trempan semper bale la pena”, Elstak ta bisa. “Bo ta mira ku den pais kaminda ta skrin mésora e kantidat di hende muhé ku ta fayesé na kanser di garganta di matris ta baha.”

Pèrdè amiga
Sharon de Maaier ta sinta na promé rei durante e enkuentro di informashon. El a trese hopi amiga huntu kuné. “Ta masha importante pa tur hende hasi e skrinen aki. Dos aña pasá mi a pèrdè un amiga na kanser di garganta di matris. E tabata mi edat, i ku dos yu chikitu meskos ku mi. E ora ei e kos ta yega hopi serka di bo.”

“Tur siman tin enkuentro di informashon den barionan”, Ethel Bynoe ta bisa. “Pero tur hende muhé por yama nos na 4623380 pa traha un sita mésora.”

Outor Dick Drayer