Segun Holtslag di Gay Pro ainda tin hopi hende ku no ke atmití nan disposishon – potrèt: Elisa Koek

Segun Holtslag di Gay Pro ainda tin hopi hende ku no ke atmití nan disposishon – potrèt: Elisa Koek

WILLEMSTAD – Un bandera grandi di kolo di arko íris, muzik kandente i algun sentenar di hende bou di gritamentu. E promé Pride Walk a tuma lugá awe na Kòrsou. E marcha a sali banda di seis or for di Wilhelminaplein i pasa riba e brùg di ponton bai Riffort.

Último añanan e organisashon Gay Pro a trata di organisá un kaminada. E aña aki nan a logra. “Hopi a kambia e añanan aki”, Frank Holtslag di Gay Pro ta bisa. “Kòrsou bèrdaderamente a bai dilanti i mi ta mira mas i mas hende ta ‘sali for di kashi’, na moda di bisa.”

Tòg segun Holtslag ainda tin hopi trabou. “Ainda tin hopi hende ku ta homoseksual undercover. Mi konosé bankero, abogado, hende den gobièrnu, ku tur tin miedu. Nan tin miedu ku lo no aseptá nan, pero e kos ta kambiando. Esei bèrdaderamente ta danki na toleransha i aseptashon.”

Brùg a habri
E gira un ratu tabatin poko suspenso pasobra nèt ora e multitut a yega na brùg di ponton el a habri. “Nos a palabrá ku ku brùg lo keda será entre mitar di shete i shet’or, pero aparentemente tòg tin un barku”, Marlous Molendijk, ko-organisadó ta konta. “Pero e atmósfera ainda ta kampion ke men nos ta djis warda un ratu.” Despues di binti minüt e barku a pasa e multitut bou di pitamentu i brug por a habri atrobe.

Esfuerso
Na Riffort a sera e Pride Walk ku e apertura ofishal di Pride Week. Minister di Desaroyo Ekonómiko Eugene Ruggenaath a tira un spich personal kaminda el a konta ku su ruman muhé ta lesbiana i kon ántes e tabata haña esaki problemátiko. “Pero na final: love conquers it all”, el a finalisá.

Outor Elisa Koek