Ger van Langen
ORANJESTAD – Entrante otro aña Sint Eustatius ta haña un servisio di ferry diario pa transportá persona pa Sint Maarten. Aktualmente no tin un konekshon via laman entre Sint Maarten i Statia. E isla aktualmente ta aksesibel solamente ku buelonan di e kompania di aviashon basá na Sint Maarten, WINAIR.
E grupo Wagenborg ta bai kambia esaki. E kompania marítimo tin 100 aña ta transportá pasahero kaba di e islanan hulandes Ameland i Schiermonnikoog.
Ferry
“Aktualmente nos ta kabando kompra di un ferry pa 350 pasahero. E biahenan dos bia pa dia ida i buelta lo kuminsá den e di tres kuartal di 2017. Un pasashi ida so entre e dos islanan lo kosta 50 dòler merikano”, direktor Ger van Langen di Wagenborg Passagiersdiensten ta bisa.
Van Langen djaluna a deliberá ku diputado di Turismo Derrick Simmons tokante e konekshon nobo, ku a anunsiá riba e promé dia di e konferensia anual di durabilidat na Statia.
Webu di oro
“Mi tin sinku aña kaba envolví personalmente den e desaroyo di e plannan pa Statia. Mi ta masha kontentu ku porfin mi por pone e webu di oro ku lo hasi e isla mas aksesibel”, Van Langen ta bisa.
Wagenborg tin plan tambe pa un servisio di ferry dos bia pa siman pa St. Kitts. Lo tin espasio limitá pa karga tambe i un akomodashon roll-on-roll-off pa dies outo.
Habitantenan di Statia a reakshoná kontentu riba e plannan. “Naturalesa i turismo ta bai huntu bon. Statia tin un naturalesa masha bunita. Mas bishitante i hende ku ta bini un dia bin konosé nos naturalesa, mas konosí e isla lo bira”, direktor Clarisse Buma di Parkenan Nashonal di Sint Eustatius (STENAPA) ta bisa.
Outor John van den Kerkhof