Un mayoria di Tweede Kamer no tin niun tiki gana di aseptá e proposishon di lei di Bosman. Potrèt: Tweede Kamer
DEN HAAG- No tabatin mas ku dies hende komo oponente di e lei di Bosman den tribuna públiko ora ku un mayoria di Tweede Kamer a rechasá e proposishon di lei. Ku esaki e proposishon di lei di e parlamentario di VVD André Bosman ta for di mesa i asina tambe e menasa di reglanan severo di establesimentu pa antiano na Hulanda. Pero tabata sinti e lei komo menasa anto?
Si bo puntra antiano ku tin intenshon di emigrá bo ta ripará ku mayoria di nan no sa mes di eksistensia di e lei di Bosman. E apelashon di e instansha ku ta sali na interes di antiano OCaN, pa bin pone un statement den tribuna públiko di Tweede Kamer kontra e lei di Bosman, no a trese mas ku dos pipita di simpatisadó.
No ta interesá hende
“Ta espesialmente esnan mas grandi di edat ku ta interesá”, Goriaka Maal di Kòrsou ta bisa. E ta un di e pokonan sintá riba tribuna públiko den Tweede Kamer. E falta di interes den e posishon di antiano na Hulanda e ta ripará serka su yu hòmber di 26 aña. “E ta bisa: pakiko lo mi mete den polítika? Mi mester traha i studia.”
No ta toka ami
Na Kòrsou tampoko e lei di Bosman no ta un tópiko kayente bou di antiano ku tin idea di emigrá pa Hulanda. “Mi a yega di tende algu si, ma bo no ta haña masha di lesa den medionan di komunikashon tokante di e tópiko aki”, Clinys Eisden di 41 aña ta bisa.
Su yu muhé di 17 aña tin e intenshon di bai studia na Hulanda otro aña. “Si a introdusí e lei di Bosman lo mi a mand’é tòg. E éksito di e studiantenan antiano ta liá espesialmente na e envolvimentu di e mayornan. Si hende bira kriminal na Hulanda ta nan mes a skohe esaki.”
Daniel Yung di 41 aña tampoko no a laga e lei di Bosman spant’é den su plannan pa emigrá, pero kisas ta pasobra, manera e mes ta bisa, e ‘sa basta poko di e lei’. “Loke m’a komprondé ta ku ta un lei ku ke pa bira difísil pa antiano sin futuro bini Hulanda. Ami no ta mira mi mes komo un antiano sin futuro. Mi ta bon eduká i mi tin un plan bon kla.”
Problema mas pisá
Nikolaj de Haan ku te siman pasá a biba na Sint Maarten for di tempu ku e tabatin sinku aña ta pensa ku e prekupashon limitá pa e lei ta espesialmente falta di e inersia di e isla. “Nos ta muchu ‘laid back’, ta esei ta nos problema. Ademas nos tin otro kos na nos kabes, manera sushamentu i koriento ku ta bai. Pero ta keda straño si ku no ta palabra algu asina, pasobra aktualmente kos ta hopi malu na Sint Maarten i pa hopi hende e baimentu Hulanda ta e último moda di salbashon.”
Ta remarkabel ku durante trato di e lei di Bosman no tabatin niun hende di e embahadanan di e tres islanan. Ora a puntra e embahadanan di Kòrsou, Sint Maarten i Aruba niun hende no ker duna un deklarashon pa nan ousensia.
Instrukshon
Èks minister plenipotensiario di Kòrsou Roy Pietersz ta kere ku e ousensia tin di hasi ku instrukshon for di polítika na e islanan: “Na moda di papia: ta un asuntu hulandes i nos ta keda afó konsientemente.”
Outornan Natasja Gibbs, Pieter Hofmann i John Samson