A kanselá e ‘tropical storm watch’ den deliberashon ku National Hurricane Center – potrèt: Meteo
WILLEMSTAD – Ta manera Matthew a pasa den un bògt rònt di Kòrsou. E orkan, ku entretantu a yega kategoria 3, a trese poko áwaseru, pero tur kos a keda trankil. “A bai hopi mas mihó ku nos a ferwagt”, segun promé minister Whiteman durante di un konferensha di prensa awe mainta.
Tòg e peliger no a kita kompletamente. Aktualmente Matthew ta keda na mas ku 300 kilometer nortwèst di Kòrsou i ainda por influenshá wer. “Hopi awa por kai ainda awe i nos ta deskonsehá tur hende di bai kant’i laman pa motibu di e laman brutu”, Albert Martis di Sevisio Meteorológiko ta bisa.
A kanselá tropical storm watch den deliberashon ku National Hurricane Center. Servisio Meteorológiko a kanselá e kódigo oraño ku tabata na vigor ayera i a deklará kódigo ros. Esaki ta enserá espesialmente ku e islanan ta haña nan ku laman brutu i eventualmente hopi áwaseru. “Tur hende por bai traha bèk por lo pronto”. Whiteman ta reakshoná. “Pero keda alerto i skucha e notisianan.”
Medidanan di prekoushon
Gobièrnu i Servisio Meteorológiko ayera a posponé e elekshonnan ku awe lo a tuma lugá pa motibu di orkan. A avisá tur hende di keda kas. “Nos no ker a tuma niun riesgo”, Whiteman ta splika. “Nos ker a evitá un situashon manera Thomas na 2010 i dankidjo tur kos a bai bon.”
Na Aruba awe nochi a kai entre 32 pa 35 milimeter di awaseru. Tabatin hopi ola na kosta i e laman brutu a destruí playanan, manera e playa popular Arashi. Bùsnan ta kore atrobe awe i pakusnan ta habrí: 11 or a retirá e storm watch pa e isla.
Pakusnan i edifisionan kant’i laman a klaba bentananan sera i a pone saku di santu dilanti e portanan – potrèt : Janita Monna
Orkan Matthew a pasa Boneiru sin insidente. A pidi habitantenan pa keda paden for di 18.00 or dijaweps atardi. Mayoria di nan a kumpli ku esaki. Hopi hende a kumpra kuminda di emergensia. Pakusnan i edifisionan kant’i awa a klaba nan bentananan sera i a pone saku di santu dilanti e portanan. E tim di krísis di Boneiru a habri nuebe shèlter pa hende ku posibelmente nan kas lo no a duna protekshon sufisiente kontra e awa i bientu ku a pronostiká. Dos persona a hasi uso di esaki.
Skolnan, bankonan, i ofisinanan di dòkter na Playa i diferente instansha lo ta será djabièrnè. Mayoria di pakusnan i e pòst di dòkter di kas ta habrí.
Rabu
E rabu di e orkan posibelmente ainda por kousa hopi awaseru i bientu djabièrnè, asina gezaghebber Edison Rijna, presidente di e tim di krísis ta bisa. Haf di Boneiru ta keda será te djasabra meinta.
Elisa Koek den koperashon ku koreponsalnan na Aruba i Boneiru