Hein van Maarschalkerwaard(d) ta duna instrukshon na Benjamin Filipie | potrèt: Dick Drayer
WILLEMSTAD – E promé konservatorio di Kòrsou por lo pronto lo kuminsá solamente ku un formashon preparatorio. Ta te otro aña e bachelor ta kuminsá. Despues di tres ronda di oudishon a resultá ku tin masha hopi talento riba e isla, kada un ku e ambishon di bira profeshonal den músika.
“Pero e nivel general ta muchu abou pa drenta bachelor”, Gerda Fokker ta bisa. E ta traha na Universidat di Kòrsou komo Quality Assurance Officer i e ta responsabel pa e lantamentu di e konservatorio.
Nivel di entrada
“E formashon preparatorio ta un trayekto ku ta fortifiká bo tantu teorétikamente komo instrumentalmente. Durante di e oudishonnan nos ta mira hopi talento instrumental. Pero pa drenta na nivel di bachelor bo mester tin konosementu di muzik, lesa nota i bo mester por demonstrá ku bo tin un aktitut di studia akadémiko. Ta un edukashon na nivel di enseñansa superior. No ta solamente toka.”
Den e oudishonnan a bin sali ku niun di e talentonan no tin e nivel pa drenta. “Awor nos a start un formashon preparatorio. Ei nos ta guia e studiantenan te na e nivel di entrada. Otro aña nos lo kuminsá ku e bachelor Muzik i Enseñansa di Muzik”, segun Fokker.
“Na e promé ròndu di oudishon nos tabata hopi mas ambisioso”, Randal Corsen ta añadí. E pianista konosí meskos ku su koleganan músiko manera Eric Calmes, Cedric Dandaré, Hein van Maarschalkerwaard i Pernel Saturnino ta bai duna lès na e konservatorio. “Pero espesialmente teoria, konosementu di muzik, ta un problema grandi. Mas grandi ku mi a kere.”
Randal Corsen ta guia e oudishon. Su tras basista Eric Calmes i tras di dje gitarista Cedric Dandaré
For di kuminsamentu
Un di e talentonan ku ta bin hasi oudishon ta Benjamin Filipie. E trahadó di UTS di 34 aña ta toka saksofon. Su talento ta mas ku opvio, segun e dosentenan di muzik tambe. “Tòg e lo mester kuminsá for di kuminsamentu” e klarinetista Hein van Maarschalkerwaard, ku ta siguié durante di e oudishon ta bisa. E ta bon den henter su repertorio, pero e mester siña e asuntu di eskala di tono, esei e no a siña nunka.”
Benjamin ta di akuerdo ku e opservashon di Van Maarschalkerwaard. “Loke mester sosodé, mester sosodé. Si mi ke bira músiko – i ta esei mi ke bra – no tin moda di hasi. Pero mi ke ta un ehèmpel tambe pa hóbennan, duna lès mi mes. Mi ke duna bèk loke Dios a dunami: talento.”
E oudishonnan a trese diesnuebe kandidato ku a kuminsá na e formashon preparatorio. Gerda Fokker ta satisfecho: “Nan ta haña enkargo di podio e promé aña aki i e intenshon ta ku Kòrsou tambe lo ripará algu di esaki. Maske ta ku presentashon na universidat mes.”
Outor Dick Drayer