WILLEMSTAD/KRALENDIJK – E parti sùit di kosta wèst ta sufri di un laman brutu. Olanan di hopi meter haltu ta bati kontra kosta. Na Pirate Bay i Hilton Hotel olanan a dal e pir kibra i no ta sigur kon e situashon ta na sobrá si e isla.

“Hopi playa na Bandabou tin daño”, Ronald Bouwland, kolaboradó tékniko di Peskeria na Ministerio di Salubridat, Medio Ambiente i Naturalesa ta bisa. “E direkshon di bientu ta kambiando aktualmente ke men awor nos ta teme pa Caracasbaai.”

“Aktualmente nos ta riba kaya pa wak e daño”, e bosero di ministerio Jair Gonçalves ta bisa. “Pero te ainda yen di kos por sosodé.” Bouwland ta konta ku e playanan di Westpunt, Kenepa Grandi i Kenepa Chikí, Santa Krus i Djeremí a haña daño. “Olanan a bati palapa saka nan bai kuné kompletamente, ranka pilá for di suela, flurnan a disparsé i tin kaminda no tin santu mas. Na Kenepa i Bok’e Samí e liñanan di landa i e vlòt tambe a disparsé.”

Bouwman ta splika ku probablemente esaki lo no ta tur kos, pasobra bientu ta birando. “Un djis nos ta bai wak kon e situashon ta na Caracasbaai, pero mi ta teme ku ei bou tambe ta bayendo hopi malu.”

Produkto di benta
Curaçao Tourist Board (CTB) tambe t’ei. Sonarie Kleinmoedig di CTB ta konta ku e Project Development Department ta opservando e situashon na e playanan. “Nos mester sa kiko e daño ta i drecha esaki rápidamente den kolaborashon ku gobièrnu.

Segun Kleinmoedig e orkannan no ta tene e turistanan afó ainda pero ta importante si pa drecha e daño lihé. E playanan di Kòrsou ta un produkto di benta importante pa CTB. “Nos tin un fondo spesial pa limpiamentu di playanan despues di situashonnan asina, e responsabilidat ei ta serka e ministerio di Medio Ambiente i Naturalesa. Nos ta yuda si pa registrá tur kos kaminda esaki tambe ta nesesario.”

Mas mal tempu
E olanan ta un rabu di e orkan Matthew ku djaweps i djabièrnè a pasa Kòrsou. Miéntras ku ku apénas a pèrdè bista riba e orkan aki, esun su tras ta aserkando kaba. “Na un distansha di mas o ménos 859 kilometer nort ost di Puerto Rico awe meinta e tempestat tropikal Nicole a nase”, Servisio Meteorológiko (Meteo) ta raportá.

Ounke Nicole segun Meteo apénas lo tin influensha riba Kòrsou, sistema 98L si ta un otro historia. E ‘sistema di wer’ aki ofishalmente no ta un tempestat ainda i p’esei e no tin nòmber ainda. “E ola tropikal aki awe meinta tabata nort di Sürnam i ta move den direkshon wèst. Banda di djabièrnè e sistema aki por kousa awaseru na Kòrsou.”

Drecha daño
E dianan binidero mester warda mira ki tipo di wer lo tin pa Kòrsou promé ku por kuminsá drecha e playanan. Nos mester warda por lo ménos un te dos dia promé ku nos sa eksaktamente kiko ta kiko”, Bouwland ta bisa.

Spice Beach, un playa popular na Boneiru - potrèt Janita Monna

Spice Beach, un playa popular na Boneiru – potrèt Janita Monna

Boneiru
Na Boneiru tambe olanan haltu ta kousa di tantu spetakel komo di keda alerto. A konsehá hende ku ta biba kantu di laman pa tuma medida di prekoushon. Kuerpo Públiko Boneiru a parti un karta den kua ta konsehá habitantenan di no keda den kas i bai ku kosnan di balor i papel importante.

Un restorant kant’i laman a sufri hopi di laman haltu i ola brutu. A tap’é ku skòt di pali i saki di santu pa proteh’é kontra awa ku tabata drenta.

Na Bachelor’s Beach na Belnem e rabu di Matthew tabata di mas spektakular. E olanan gigante i e forsa ku kua nan tabata bati riba kosta a atrahé hopi miron.

Outornan Elisa Koek i Janita Monna