Ta Hensley Koeiman ta bira e promé minister nobo? – potrèt: Elisa Koek
WILLEMSTAD – Partido MAN a gana elekshon na Kòrsou. E partido a haña 16.2 porshento di e votonan. Un ratu e kos tabata kandente: Movementu Futuro Kòrsou a sigui nan ku 16 porshento i Partido PAR ku 15.1 porshento.
Na final MAN a kue 4 asiento. E pregunta awor ta ku ken MAN ta bai forma koalishon. Ta konosí ku nan lider anterior Charles Cooper no tabatin problema pa koperá ku Schotte su MFK, e lider di e partido aktual, awe Hensley Koeiman manera ta evitá e pregunta. “Nos ta koperá ku hende ku ta íntegro i ku ta kumpli ku nos kondishonnan. Ken nan ta, esei nos mester wak ainda. 66 porshento di esnan ku derechi di vota a vota ayera.
Un reportahe di Sharelly Emanuelson:
Partidonan MAN, MFK i PAR a kue 4 asiento. E partido nobo Kòrsou Di Nos Tur di Amparo dos Santos ta sigui ku tres asiento. PNP i Pueblo Soberano tur dos tin dos asiento. Movementu Progresivo di Marilyn Moses i Omayra Leeflang su Un Kòrsou Hustu tur dos a haña un asiento.
Djis despues ku e promé sentronan elektoral a saka nan resultadonan, a sali kaba ku MAN tabata skor haltu. PAR i MFK tur dos un tempu tabata mas haltu ku Hensley Koeiman su MAN, pero na final MAN a keda para stabil riba promé lugá. “Nos ta bèk”, Yaël Piet, number 6 riba lista di MAN ta bisa. “Nos a demonstrá ku nos ta transparente i nos ke koperá ku hende íntegro.”Enrique Kroon ta añadí: “Nos planifikashon i vishon ta kuadra: esaki ta bon reglá i hende sa. Korupshon a kaba.
Alegria serka PAR – potrèt: Elisa Koek
A spera si
No ta bisa ta ken e hendenan íntegro aki ta. Den partido PAR ta reakshoná positivamente riba e resultadonan di MAN. “Nos ta mira esaki sigur sigur komo un desaroyo positivo ku ta MAN ta te ariba”, Stephen Walroud ta bisa. PAR tambe ta hasi un ‘come back’. “Nos a spera si, pero nos no a ferwagt”, lider di e partido Zita Jesus-Leito ta bisa. Ta promé bia ku e ta partisipá na elekshon komo lider di e partido. “Esei ta hasi esaki masha spesial. Nos ta kontentu ku nos a haña e konfiansa di pueblo atrobe.”
Alegria na ofisina di MFK – potrèt: Elisa Koek
MFK
MFK tambe ta kontentu sigur. For di 20.00 or kaba e kaya ta yena yen di outo ku ta pita pa duna nan sosten na e partido. Sithree van Heydoorn ta konta ku e partido a mira mas o ménos delantá kaba ku e éksito lo bini. “Bo ta tende e relatonan riba kaya i bo ta sigui e sondeonan ke men bo ta prepará si.” Heydoorn no por kontestá ku ken MFK ke i por forma un koalishon: mester palabrá esaki ainda.
Kiko lo pasa si kondená Gerrit Schotte i e mester bai será ora MFK ta den koalishon, Van Heydoorn ta bisa ku esei tampoko e no sa. “Ken ta bai sinta riba su asiento? Mi no por duna niun deklarashon tokante esaki, berdaderamente lo dependé di futuro.”
Partidonan mas chikí
E partidonan chikí nobo a haña resultado chikí tambe. E partido di èks promé minister Ivar Asjes, Pro Kòrsou a kue solamente 1.4 porshento di e votonan. Èks miembro di PAR Omayra Leeflang a haña 5.6 porshento. Tòg esaki no ta un desapunte. “Mi tabatin sero asiento, awor mi tin un. Lo mi tabatin gana di a haña dos òf tres, pasobra e ora ei bo por hasi e diferensia, pero lástima.”
Leeflang tabatin gana di por a duna su number 2 Gwendell Mercelina un posishon, pasobra e mes ta menguando su karera polítiko. “Mi ke un partido ku ta duna nos lidernan hóben un chèns, pasobra pa mi esaki ta e último añanan. Aki kuater aña Sra. Leeflang mes lo no ta den polítika mas.”
Outor Elisa Koek