Sinku polis a arestá Mitch Henriquez na 2015 na Zuiderpark na Den Haag, loke a resultá fatal pa e arubano di 42 aña – potrèt: Facebook
HILVERSUM – E abogadonan di e famia di Mitch Henriquez ta mashá rabiá pa e manera ku polis ta trata e kaso. E timing tambe pa awe publiká tokante e investigashon interno ta ‘masha kurioso’, abogado Richard Korver ta bisa.
Èks hefe di kuerpo di polis Gerard Bouman a primintí e sinku polisnan envolví ku lo no kita nan for di trabou, asina e korant NRC a revelá djabièrnè. Segun e abogado e famia ta ‘hopi di shòk’pa e palabranan di Bouman.
Polis djabièrnè ta konfirmá e interkambio remarkabel aki den email di e èks hefe di kuerpo. Bosero di polis no ker a kontestá pregunta di prensa. Mas lat den atardi polis mes a laga sa ku a finalisá un investigashon interno i ku kuater di e sinku polisnan por lo pronto ta di skòrs ainda. E di sinku polis denter di poko por kuminsá traha den ‘un ambiente di trabou apropiá’. Un táktika di polis pa evitá publikashon di e ‘ekspreshonnan loko’ di e èks hefe di kuerpo di polis, abogado Kòrver ta suponé.
E abogadonan di famia Henriquez mes no a mira e rapòrt interno tokante e sinku polisnan ainda. “Nos no sa kiko e inkumplimento di deber di e polisnan ta enserá. Ta parse mi mas ku normal ku famianan di e defuntu ta haña e investigashon i e resultadonan mira komo promé. Na lugá di esaki nos mester tende tur e kosnan aki na radio. Niun hende di polis no ta buska kontakto ku nos.”
Promesa
Bouman ku a retirá kuminsamentu di e aña aki, lo a hasi e promesa durante un enkuentro dia 17 di sèptèmber di 2015. Ei a papia tokante e situashon ku por surgi komo konsekuensha di e investigashon penal i disiplinario kontra e polisnan.
“A base di e situashon e hefe di kuerpo di e tempu ei a primintí e koleganan un ke otro. E hefe di kuerpo aktual a tuma nota di esaki.”, asina e deklarashon kòrtiku di polis. “E ta konsiderá esaki komo un dato. Aktualmente ta un despacho eksakto di e proseduranan di e trayekto i disiplinario i penal ta para sentral p’e.”
Kaso den korte
Famia Henriquez ta kunsumí ku ta ‘solamente’ dos di e sinku polisnan envolví hustisia lo pèrsiguí. E abogadonan ta trahando riba un prosedura pa por laga e otro tres polisnan tambe parse dilanti wes. “Ademas nos ta haña ku mester pèrsiguí e polisnan pa perhurio”, segun Korver.
Outor John Samson