Duana kontrolando merkansia ku ta bai pa Venezuela – potrèt: José Manuel Dias
WILLEMSTAD – Den un lapso di seis siman a sali for di Kòrsou mas di sheteshen mil florin na merkansia rumbo pa pais bisiña Venezuela via di e barkunan di fruta venesolano. “Si ántes e barkunan aki tabata sali ku un òf dos kaha di merkansia, aktualmente nan ta transportando palètnan kargá ku prinsipalmente produktonan di promé nesesidat”. Asina Leopold Raphaela hefe di e pòst di Duana na Punda a duna di konosé.
Aparte di produktonan di promé nesesidat ta eksportando wiski i otro produktonan tambe. Últimamente Duana a tuma nota ku ta mandando tayer di outo i piesa di èrko tambe. “Nos a ripará ku eseinan tambe ta kresiendo”, Raphaela a konfirmá. E oumentu drástiko den e kantidat di merkansia pa Venezuela a pone ku Duana mester a hisa e kòntròl na salida di e barkunan miéntras ku a aloká un otro entrada na Kleine Werf pa atendé ku e klientenan.
Un reportahe di José Manuel Dias
Kla pa subi barku
Semanalmente tin trinta barku venesolano ku ta trese prinsipalmente fruta i berdura pero tambe piská i otro produktonan pa abastesé merkado lokal. Normalmente e barkunan aki ta bai bèk ku masha tiki merkansia for di Kòrsou pero último lunanan e situashon aki a kambia drástikamente. Riba tur djarason i djabièrnè ku ta e dianan ku Duana a stipulá ku e barkunan aki por sali, por mira for di oranan tempran di mainta un kantidat grandi di bulto di merkansia butá dilanti di e entrada di Kleine Werf kla pa subi e barkunan.
Produktonan mas buská
Banda di e personanan ku ta manda produktonan pa konsumo personal tin hopi doño di barku ku ta kumpra merkansia por mayor serka agensianan lokal i ta bende esakinan na Venezuela. Segun e komersiantenan ambulante aktualmente den nan pais ta reina un skarsedat enorme di produktonan di promé nesesidat. E produktonan mas buská ta suku, aros, hariña di funchi, zeta pa kushiná, manteka i produktonan di higiena personal. “Aktualmente bo no ta haña nada di e produktonan básiko aki”, Juan ta lamentá.
Tur merkansia ku ta riba Kòrsou ta merkansia liber i komo tal no tin limitashon pa eksportá pa Venezuela, basta kumpli ku e formalidat di Duana i hasi un deklarashon di eksportashon. “No tin limitashon riba e tipo di merkansia tampoko basta ku ta trata di merkansia legal”, Raphaela a enfatisá. Esaki ta konta tambe pa produktonan ku tin akseins riba nan manera por ehèmpel wiski.
Wiski pa Venezuela
Eksportashon di wiski pa Venezuela hasiendo uso di e barkunan di fruta venesolano no ta un kos di aworakí. Segun Raphaela tur tempu tabatin kompanianan den Zona Liber ku tabata eksportá produktonan pa Venezuela. E úniko diferensia ta ku e merkansia den Zona Franca no ta liber i komo tal e ta kai direktamente bou di supervishon di Duana. Esaki ta nifiká ku Duana ta seya e kargamentu i ta vigilá esaki for di momentu ku e sali Zona Liber te ora e barku bandoná Kòrsou ku e merkansia.
Pa fasilitá e kontròl di Duana a simplifiká e trámite di deklarashon di merkansia pa klientenan individual. Segun Leopold Raphaela si e eksportashon pa Venezuela sigui krese Duana lo konsiderá pa pone un dia èkstra pa e barkunan por sali.
Outor José Manuel Dias