Minister plenipotensiario di Aruba Alfonso Boekhoudt – potrèt: Arubahuis
ORANJESTAD – For di e karta di oferta di minister Ronald Plasterk di Asuntunan Interior i Relashonnan den Reino na Konseho di Minister di Reino a sali ku personalmente el a nominá minister plenipotensiario Alfonso Boekhoudt komo kandidato-gobernador di Aruba.
A manda e karta di oferta riba 29 di sèptèmber pa Konseho di Minister di Reino. Den e karta aki Minister Plasterk ta mustra ku e di dos término di Fredis Refunjol a pasa for di 1 di mei. “A base di artíkulo 4 di e reglamento pa gobernador di Aruba, ku ta proskribí ku e Gobernador na funshon ta keda riba su puesto te ora ku su susesor a aseptá e puesto, ainda Gobernador Refunjol ta riba su puesto.” Segun Plasterk esaki ta ‘un solushon pa un tempu limitá’.
E ta indiká ku tabatin kontakto último lunanan ku Aruba tokante posibel kandidato pa e funshon di gobernador, sin resultado. Ta p’esei den e karta e ta pidi Konseho di Minister di Reinopa bai di akuerdo ku su nominashon di Alfonso Boekhoudt. Athunto den e karta tin e CV di e minister plenipotensiario.
Bermudez
Na mart tabata kla ku minister di Finansa Angel Bermudez tabata un di e kandidatonan riba e lista ku gobièrnu arubano a proponé na Konseho di Minister di Reino. Èks Minister di Salubridat Públiko Israel Posner i èks dosente Glenda Margaretha tabata e otro nòmbernan riba e lista.
Promé minister Mike Eman e tempu ei tambe a indiká ku tin rumor ku Alfonso Boekhoudt i e minister plenipotensiario na Washington, Andy Lee, lo por tabata posibel kandidato. “Di tur manera nos ta trata di tene e nòmbernan i e kombersashonnan mas parti interno. Pero e isla ta keda chikí”, Eman a splika e tempu ei. Minister Plasterk a reakshoná riba esaki den un deklarashon na prensa ku un kandidatura pa Bermudez ‘no tabata e kaso’. Despues for di e tempu ei masha poko a bira konosí tokante e proseso.
Gobièrnu hopi malkontentu
Despues ku Gobièrnu di Reino siman pasá a divulgá ku ta Boekhoudt ta e kandidato-gobernador, gobièrnu arubano no a duna niun deklarashon. Promé minister Eman te awor no ker a reakshoná. Fuentenan rònt di e promé minister ta bisa ku gabinete ta niun tiki kontentu ku e nominashon di un banda so i nombramentu di Boekhoudt. Tin papia ku aktualmente ta kontemplá pa no opstante su nombramentu manda busk’e bini Aruba bèk pa asumí su puesto di direktor di e outoridat di haf atrobe. Pero Ret Karibense no por a konfirmá esaki independientemente.
Outor Ariën Rasmijn