Promé minister Mike Eman i minister di Relashonnan den Reino Ronald Plasterk durante un bishita di pareha real na Aruba aña pasá – potrèt: Sharina Henriquez
ORANJESTAD – Den un karta di promé minister arubano Mike Eman na promé minister Rutte komo presidente di Konseho di Minister di Reino, Eman ta eksihí pa retirá e nombramentu di Alfonso Boekhoudt komo gobernador. E desishon aki segun konseho di minister di Aruba no ta legítimo.
A manda e karta dia 12 di òktober, sinku dia despues ku a nombra Boekhoudt. E nombramentu ta ‘flagrantemente kontra e reglanan ku konseho di minister di Reino a stipulá’, Eman ta skibi.
For di e karta ta sali tambe ku konseho di minister arubano ‘for di kuminsamentu a aklará’ ku nan a rekomendá Angel Bermudez komo kandidato. Aktualmente Bermudez ta minister di Finansa. “Despues a invitá Sr. Bermudez pa un kombersashon pa sera konosí ku e minister di Asuntunan Interior i Relashonnan den Reino.”
E karta ta kontené un anekso tambe ku e reglanan pa nombra gobernador. For di esaki ta sali ku ta ‘solamente konseho di minister di Aruba ta outorisá pa selektá un òf mas kandidato pa bira gobernador’, asina Eman a bisa promé minister Rutte. Segun e, no ta toka na minister di Relashonnan den Reino pa independientemente selektá kandidato.
Den esaki Eman ta reprochá minister Ronald Plasterk di Relashonnan den Reino ku ta e mes a nominá Boekhoudt komo kandidato. Promé minister di Aruba ta terminá su karta ku e eksigensia pa retirá e desishon i pa kambia di idea ku Rutte tokante di esaki riba término korto.
Plasterk ta nenga ku Hulanda no a kumpli ku e reglanan di nombramentu di un gobernador nobo pa Aruba. Pa medio di su bosero e ta laga sa ku e prosedura di nombramentu ‘a bai konforme e stipulashon den Statüt’.
Plasterk no ke bisa nada tokante e karta rabiá di promé minister Eman. Ni tampoko si e ta bai retirá e desishon. “Mester kontestá e karta ainda”, e bosero ta bisa. E no por bisa tampoko si a tuma kontakto kaba ku gobièrnu arubano pa motibu di e disturbio ku a surgi.
Segun Plasterk ‘ta opvio ku Boekhoudt ta retirá di su funshon aktual di minister plenipotensiario’ awor ku entrante yanüari Boekhoudt lo bira e representante di rei na Aruba.
Outor Sharina Henriquez