Direktor Karin Hermans di Yudaboyu – potrèt: Anneke Polak
WILLEMSTAD – Michael di diestres aña a kaba di pasa un aña masha malu mes. Su kompañeronan den klas tabata tent’é hopi i e tabata reakshoná agresivamente. Ku terapia na Yudaboyu e ta bai mas mihó. Wela: “El a bira henteramente un otro persona.”
Segun Karin Hermans, direktor i sikiater di na Yudaboyu, Michael ta un di e hopi muchanan ku problema di kondukta. E poliklínika, ku ta kai bou di Klínika Capriles, aktualmente ta yuda un 800 mucha ku kuido síkiko. “Si bo mira kuantu mucha no ta bai skol pa motibu di problema síkiátriko, esaki ta tristu. Nos no tin sifra eksakto, pero Kòrsou mester haña un skol pa mucha ku tin hopi difikultat edukashonal, un skol ZMOK.”
Hermans ta un di e trahadónan den salubridat mental ku e siman aki a firma un karta hopi rabiá pa minister di Salubridat Públiko Ben Whiteman. Kuido di salubridat mental na Kòrsou basta tempu kaba ta den un krísis e grupo di trahadónan ta bisa, i esaki ta bai na kosto di kuido. Hermans: “No solamente no tin kresementu, nos ta bai asta atras. Ku un bùdjèt muchu chikí nos no por trata petishon grandi mas. Esaki ta un konsekuensha di e echo ku no ta tuma sikiatria serio.”
Sikósis
Anto e ora ei kiko bo ta hasi, e direktor di Yudaboyu ta bisa. “Ofresé ménos i ménos kuido, pasobra bo no por paga.” Un problema serio pa komunidat kurasoleño, e sikiater ta haña, pasobra e por pone un laso entre dropout òf kuminsamentu di kriminalidat i su klientenan. “Un hóben ku un sikósis ku nos no yuda, ta bira un hende ku pa sobra di su bida ta kana na Klínika Capriles. Esaki no por ta e intenshon pa nos hubentut, no ta bèrdè?”
Skòrs manda kas
Ainda dosentenan no tin sufisiente konosementu di problemanan di kondukta i ADHD. “Aktualmente nos no tin e bùdjèt pa siña dosente kon nan mester trata ku esaki, na lugá di skòrsnan i manda nan kas. Tin mucha ku for di promé dia di skol ta tende ku e skol no ke nan.”
Ta duna kuido mental for di un edat hopi hóben kaba.
Michael a kustumá atrobe na su skol. “Mi tin amigu i nan no ta tenta mi mas. Tin bia ora nan kuminsá mi ta kana bai, ta dòkter Hermans a siña mi”. Wela ta wak su ñetu yen di orguyo. Segun Hermans e ròl di mayornan i famianan ta esensial pa un bon tratamentu: “Si sobrá di e famia ta na altura i sa kon trata ku e problema, esaki ta krea trankilidat na kas
Outor Anneke Polak