Den un espasio chikí sin awa dos amigu ta pasa nan dia – potrèt: Gijs van den Heuvel
KRALENDIJK – Pa skapa di pobresa bo mester haña trabou. Asina Johnny (no su nòmber di bèrdat), ku huntu ku un amigu ta biba den un espasio chikí tras di un kas kibrá bashí. Nan tin koriente si pero awa nò. Pa sobreviví nan ta haña ayudo di Denice Boelen i un tanta.
Gloria ta biba ku su kasá, yu muhé i ñetu den un bario ku pa bista ta nèchi. E kas ta di famia i nan por biba ei temporariamente. El a stòp di traha pa kuida e yu di su yu tiner, pa e por sigui bai skol. “Tur kos ta pa mi yunan, mi no ta laga nan bai skol ku hamber. Mi a pidi ayudo na Asuntunan Sosial, pero mi no ta bini na remarke pasobra mi kasá tin trabou.” E 800 pa 1000 dòler ku su kasá ta gana e no ta yega te fin di luna. “Mester bini mas ayudo na Boneiru”. Gloria ta haña.
Un reportahe di Gijs van den Heuvel
Den kunuku di Boneiru Jonchi Martis* ta biba ku su famia den un kas ku nan mes a traha di zim. Tur huntu e ta mas o ménos 10 meter kuadrá. Famia Martis no tin ni koriente ni awa. “Mi tabatin un generator pero el a daña.” E baño ta un pòchi di WC pero e no tin funshon, pasobra no tin awa. Pa 40 dòler Jonchi ta kumpra un tanki di awa, ku el a pega un bòter di limonada di plèstik kabes abou na dje, di moda ku tin un tipo di kranchi.
E kamber di drumi ta konsistí di dos kama pushá kontra otro kaminda henter e famia ta drumi: mama, tata i tres yu entre tres luna i sinku aña. “Nos ta drumi bentana habrí. Esei ta dushi fresku si. Pero si áwaseru kai, manera e anochi ku a pasa aki, nos ta muha i mester sera bentana.”
De bes en kuando Denice Boelen ta duna famia Martis algun kos. E ta hasi esaki pa hopi hende pober na Boneiru. “Mi mes a lanta den pobresa.”
E kushina chikí di famia Martis – potrèt: Gijs van den Heuvel
Sin trabou
Jonchi ta konta ku el a pèrdè su trabou ora ku e mester a bai será dos luna pa un bringamentu. “Mi ta barbero i mi tin un diploma di plomero. Pero mi no ta haña trabou. Nan ta bisa ku nan no mester di mi.” E ta gana entre 50 pa 200 dòler pa luna.
E plaka ku e ta gana ta bai pa kuminda pa e muchanan na promé lugá. “Nan mester di dje pa nan siña. Tin bia mi mes ta kome solamente dos pida pan, paso bo mester kome algu pa bo por drumi.” For di dos luna e ta haña kompensashon pa yu tambe 40 dòler pa yu. “Pero esaki no ta sufisiente pa kumpra un luna di kuminda” Mester di plaka tambe pa gasolin pa hiba e muchanan skol.
Pobresa skondí
Segun Boelen hopi pobresa ta keda skondí. “Si bo kore solamente riba kaminda grandi bo no ta mira. Bo mester drenta e kamindanan djaden, e ora ei bo ta topa hopi pobresa.” Segun Boelen e problema ta hopi mas grandi ku hende ta pensa.
* Nòmber fiktivo
Outor Gijs van den Heuvel