Jacqueline Cyntje-Mambi, koordinado Edukashon Spesial pa RKCS – potrèt: Deya Mensche
WILLEMSTAD – Últimamente, tin hopi krítika di mayornan ku e transferensia di skol spesial pa skol sekundario ta laga hopi di desea. Komo konsekuensia, gran mayora di e alumnonan ta resulta na AGO, ku práktikamente ta na su máksimo kapasidat, paso no ta invirtiendo sufisiente den e trayektoria edukashonal di alumnonan ku ta kompletá skol spesial. Según Jacqueline Cyntje–Mambi, koordinadó di Skol Spesial di Direktiva di Skol Katóliko (RKCS), un mucha di skol spesial of LOM, mester por bai VSBO i asta HAVO, mes kos di un alumno di enseñansa di fundeshi.
.
Na 2002 a bini ku inovashon drástiko riba enseñansa di fundeshi, unda a opta pa duna les na e nivel di e mucha. Según Cyntje–Mambi, no tin lei di skol spesial ankrá, pero kada direktiva eskolar, huntu ku gobièrnu, ta yega na sierto akuerdo. Direktiva di Skol Katóliko i VPCO a disidí ku skol spesial ta un ekstenshon di enseñansa di fundeshi i ta usa e mes un método ku esun spesial. “Muchanan djawendia no ta siña riba e manera di antes i ta funshoná hopi digital, i p’esei nos a introdusí laptop, tablèt i digibord”, Cyntje–Mambi a splika. “Pero nos a haña nos ku hopi ladronisia anto e invershon ta eksigí mantenshon, sino e teknologia ta avansá asina tantu ku bo ta pèrdè e invershon”, ela añadi.
Deya Mensche ta papia ku Wendel Isidora i Jacqueline Cyntje–Mambi
Según Miguel Goede, hefe di VPCO, AGO ta diseña pa prepara e alumno riba un trayektoria pa drenta forsa laboral ku no tin a kapasidat di sinta den banki muchu, pa asina nan por siña un fishi. Direktiva di Skol Katóliko i VPCO no ta komprondé e reklamo di e mayornan basa riba e resultado di e ultimo añanan. Tur dos direktiva di skol a produsí sifranan una ta indiká ku gran mayoria di nan kandidatonan di eksámen a bai VSBO, i ta un grupo chikí a bai AGO. Si Goede a splika ku tin un investigashon andando ku ta indiká ku sierto skolnan di enseñansa básiko ta produsiendo mas alumno di AGO ku normal, pero ainda e no a mira e resultado final. Cyntje – Mambi di su partí a konstatá ku últimamente alumnonan di skol spesial i enseñansa di fundeshi ta tumando lugá di e muchanan ku hopi problema di siña na AGO.
Wendel Isidora, kabes di skol di Divi Divi – potrèt: Deya Mensche
Wendel Isidora, kabes di skol Divi Divi, ke pa e forma di traha kambia i ku edukashon spesial keda tumá más na serio. “Mi no por imagina mi ku tin skol spesial ku no tin un supervisor interno i dosente di apoyo pa traha ku e alumnonan. E no ta un luho pero un eksigensia”, ela deklará.
Resientemente VPCO a introdusí un transferensia kaluroso pa VSBO, unda e koordinadó di kuido ta bai bishitá, huntu ku e mayornan i e mucha, e skol nobo, pa asina skol komprondé kon pa guia e mucha más mihó. Na febrüari di aña pasa, Direktiva di Skol Katóliko a introdusí un test pa alumnonan di skol spesial, similar na e test di EFO. Ora e alumno yega AGO, esaki tin un ekspektativa di dje, i e test akí ta determina kiko e mucha por, pa asina nan sa kon mester guie. VPCO no ta hasiendo e test ainda, paso Direktiva di Skol Katóliko ke determina ki resultado esaki lo duna promé, Cyntje – Mambi a splika.
“Nos mester di más personal, paso tin un skarsedat di maestro i e instituto di edukashon no ta produsiendo sufisiente maestro, paso e profeshon no ta paga sufisiente”, Cyntje – Mambi a finalisá.
Outor Deya Mensche