Virólogo Dr. Byron Martina | Potrèt: Dick Drayer
WILLEMSTAD – Un dies pashènt asina na Kòrsou ta infektá ku un viro deskonosí. Nan a pasa serka dòkter di kas ku síntoma manera chikunguña: keintura, dolo den skarnir i iritashon kòrá di kútis. Chikunguña ta un enfermedat di viro ku un sangura ta transmití.
A tèst tur e pashèntnan pa e enfermedatnan di sangura Chikunguña, Zika i Dengue, pero den tur kaso e resultadonan tabata negativo. Dr. Byron Martina, virólogo na Universidat Erasmus i Universidat di Utrecht awor ta bai ku muestra pa investigá na Hulanda.
Dr. Byron Martina ke sa si kisas ta trata di infekshon ku e viro relativamente deskonosí Mayaro i si e pashènt tin protekshon kontra e viro aki pasobra den un fase anterior e tabata kontaminá ku e viro di Chikunguña. “E chèns ku bèrdaderamente ta trata di Mayaro ta chikí”, Martina ta bisa. “E viro te aworaki ta eksistí espesialmente den áreanan ku hopi boske ku makaku, manera na Brazil i Trinidad. Ke men bo no ta ferwagt e.”
Na 2015 nèt ei, na Trinidad, a diagnostiká un mucha hòmber di 8 aña, meskos ku na Haiti. “En berdat tin indikashon ku e viro a bira ‘urbano’, pues por transmitié posiblemente den sirkunstansha manera na Kòrsou”, Martin ta bisa.
No ta sangura tiger ta pasa Mayaro, e sangura di Dengue, Chikunguña i Zika. “Pero di investigshon den laboratorio nos sa ku e viro por adaptá na sangura nobo. Despues di e orkan Matthew ademas e sirkunstanshanan a bira masha positivo pa e sangura tiger. Si e viro adaptá na e sangura ei nos tin un problema”, segun Martina.
Por lo pronto Kòrsou no tin nodi di prekupá, Martina ta haña. “Nos no mester fiha muchu riba Mayaro tampoko. Nos mester tèst ampliamente i wak promé si ta trata di algu nobo, algu ku nos no konosé ainda.”
Awe e virólogo tin un enkuentro ku e epidemiológo di GGD Izzy Gerstenbluth. Huntu nan ta bai establesé un protokòll pa fasilitá e investigashon na Hulanda.
Outor Dick Drayer