WILLEMSTAD – E pisina na SDK tin un aña será kaba i por lo pronto lo e no ta kla. Ounke ta trahando riba renobashon a surgi retraso. “Nos ta spera ku e pisina lo kaba lihé”, presidente Glyselle Hanst di Federashon Aquatico Kòrsou ta bisa.
Segun Hanst komo organisashon nan no tabatin ni nan no tin influensha riba e retraso. “Nos ta un organisashon ku ta dependé di plaka di gobiernu i banda di esaki nos ta dependé tambe di e kompania ku ta hasi e renobashon kompleto di e stadion.” Si no tin pisina esaki tin konsekuensha pa e diferente timnan di natashon, e landadónan di kompetishon na Kòrsou.
Orguyoso
Sigmund Sasso, presidente di Sithoc: “Den e selekshon di aña pasá tabatin mas ku mitar di e tim di Sithoc, nan tin un landadó tambe nombrá komo atleta di aña: Isacar Paula. Ademas nos tin Mauricio Payne, Adrian Hoek i Tiareth Cijntje ku ta forma parti di un tim kampion”. Coach di Sithoc Reginaldo Bizuela Gonzales ta indiká ku nos mester ta orguyoso di nos hóbennan ku ta hasi deporte, ku ta bin trein tur dia i ku ta traha na nan disiplina.
Un di e landadónan ta konta ku schoolslag ta su slag favorito ya ku ta esaki e ta sinti su mes mas kómodo kuné. Banda di e kampeonatonan internashonal e lo ke partisipá na Weganan Olímpiko. Pa Reginaldo un pais/isla mester pèrkurá pa mira deporte komo un prioridat i e fasilidatnan tambe ta pertenesé na esaki.
Kompetishon di natashon
Normalmente Federashon Aquatico ta organisá seis pa ocho kompetishon di natashon pa aña. Banda di esaki e klupnan di natashon mes tambe por tuma e inisiativa di organisá un kompetishon i e ora ei nan por pidi Federashon Aquatico pa sosten pa asina hasi tur kos segun reglanan di Fina. Un ehèmpel di esaki ta e Eu Swim ku Buladó a organisá e luna aki.
Pero por organisá ménos kompetishon pasobra ta un pisina di 25 meter ku por usa so tin. Ke men e timnan no por trein optimalmente i e landadónan di mas mihó, ku ke kompetí den kompetishon internashonal, ta haña nan ta bai afó pa alkansá nan tempunan. E timnan ta sinti un limitashon pa motibu di esaki i nan ta pèrdè miembro i no ta haña landadó nobo fásil.
Laman
Banda di Kòrsou Boneiru tampoko no tin pisina i nan ta trein den laman so. Aruba ta bai bon i ta mek riba Olimpiada. Federashon Aquatico Kòrsou, e klupnan di natashon i e landadónan ta spera ku otro aña nan por landa na SDK atrobe.
Outor Sharelly Emanuelson