Imágen: Ninsee
AMSTERDAM – E falta di konosementu di e páginanan pretu di pasado kolonial di Hulanda ta kousa mas intoleransia i rasismo na Hulanda. Asina un grupo di studiante antiano na Hulanda, di diferente estudio, ta haña.
‘Hipókrita’ i ‘protekshonismo blanku’, e grupo di studiante antiano ta yama e manera ku enseñansa hulandes ta duna atenshon na e temporada kolonial. E studiantenan ke enseñansa mas amplio i mas honesto tokante e tópiko aki. Nan no ta nan so: profesor Gloria Wekker huntu ku e Komishon di Diversidat na Universidat di Amsterdam tambe ta boga pa kambio.
Ekspreshonnan ‘bobo’pa falta di konosementu
E studiantenan antiano no tin masha konfiansa ku sin intervenshon di polítika for di enseñansa mes lo bini atenshon pa e pasado kolonial di Hulanda. “Den e bukinan di historia hulandes kaba ta tapa hopi i ta hasi e kos ménos malu ku e tabata segun e relatonan”, Michantely de Jong di Rotterdam di 25 aña ta haña.
Su mayornan ta di Kòrsou i e mes a nase i lanta na Hulanda. “Ta pasobra ku mi mes investigashon mi a haña sa ku por ehèmpel ginekologia a lanta pasobra tabatin eksperimento hororoso riba esklabo pretu i nan beibi. E kosnan ei bo no ta siña na skol. Pasobra si nos tabata sa esaki, polítikonan manera (èks promé minister Jan Peter) Balkenende, lo no a tribi di papia ku orguyo tokante e mentalidat di VOC. Niun hende lo no a aseptá òf hari.”
Gouden Koets tin un ilustrashon na banda yama “Homenahe di Kolonianan”
Importante pa identidat
E arubano di 23 aña Tamar Kelk di Rotterdam ta haña ku mas konosementu di e propio pasado kolonial por evitá hopi diskushon i trese mas komprenshon, bou di antianonan mes tambe. “Si hulandesnan tabatin mas konosementu di tur loke a sosodé den kolonianan i ku esklabo lo bo a tende ménos kos manera ‘bai bo lugá bèk’ òf zonido di makaku serka un hende koló skur. I e ora ei asta e diskushon di zwarte piet lo no a bira asina mahos. Antianonan mes tambe lo a komprondé ku nos tur ta desendiente di esklabo i ku algun tono mas kla òf mas skur lo no hasi niun diferensia ora nos ta papia di historia.
Tarea importante pa polítika
Gert Oostindie, profesor den Historia karibense i direktor di Koninklijk Instituur Taal- Land en Volkenkunde (KITLV), ta komprondé e keho di e studiantenan. E ta enfatisá tambe ku enseñansa tin di hasi ku eskoho. “Tin masha tiki espasio den enseñansa pa historia. I mester trata hopi. KITLV ta traha material di lès adishonal si: “pero e eskoho finalmente ta keda na e dosente si e ke usa e material èkstra. E dosente na su turno ta guiá pa loke ta ferwagt na e tèst di Cito òf e eksámen final”
Detaye di Gouden Koets – potrèt: Ninsee
Pa e motibu aki Oostindie espesialmente ta mira un tarea pa polítika. “Polítika por disidí kiko alumnonan mester sa tokante nan pasado kolonial na kabamentu di nan tempu na skol.” Pero no ta sigur ku esaki lo sosodé tambe. Den e konseho ku un komishon di enseñansa a duna mas trempan den aña tin ménos lugá pa e materia historia den enseñansa básiko i sekundario. E intenshon ta pa historia hulandes bini bèk den otro materia.
Outor Natasja Gibbs