No opstante e krítika tur partido ta di akuerdo ku kos mester kambia den KPCN – potrèt: Gijs van den Heuvel
KRALENDIJK – E memo di èks hefe di Polis Nashonal Gerard Bouman tokante integridat den Kuerpo di Polis Hulanda Karibense (KPCN) ta pa kita atenshon for di su mes problemanan. Asina presidente Charles Mercelina di sindikato di polis NAPB BES ta bisa. Den e memo, ku a lèk djasabra via e korant Trouw, ta usa palabra skèrpi tokante integridat di e kuerpo.
“E tarea pa Bouman tabata henteramente algu otro. El a mete den algu ku no a pidié hasi. Un maniobra pa despistá, ku tabata bon pensá, i ku a faya.” Na Hulanda ta reprochá Bouman ku e no a logra pone òrdu serka Polis Nashonal i resientemente a hasi un investigashon di entre otro e biahenan no nesesario pa Konseho Sentral di Empresa ku trabou tabata paga.
Outo di trabou
Kontra di boluntat di sindikato Minister Ard van der Steur di Seguridat i Hustisia (V&J) a pidi Bouman konsehá tokante organisashon di KPCN. Pero den un memo separá e ta bisa ku mester pone òrdu por ehèmpel kontra uso di outo di trabou pa motibunan privá i skibimentu di ofertaim sin tin nodi.
“Ta duna otro falta kaminda e mes ta kulpabel. Mi no por bis’é mas nèchi”, Mercelina ta bisa. Pa añadí ku mester desaroyá e protokòl di integridat mas aleu. Pero mester tene kuenta si ku e situashon lokal.
Korpsbeheerder bou di mandato Jan Willem Schaper, ku ta representá minister Van der Steur, a laga sa for di djabièrnè ku e, ‘e mandatarionan’ i Ministerio Públiko (OM) por bai di akuerdo ku otro den e liñanan prinsipal. Djaluna pasá a palabrá e rapòrt ku Bouman mes, komisario hefe Frank Pauw, ku tin e kartera di área karibense di Polis Nashonal, i e partnernan mas envolví. E temanan sentral ta: “drechamentu purá di e kapasidat di KPCN, maneho efektivo i duna forsa na e maneho. “
Orguyo
Sindikato NAPB tambe ta ‘kombersá’ ku e korpsbeheerder i e maneho di KPCN, Mercelina ta bisa. Di kontenido e bònt tampoko no ta haña e rapòrt dje malu ei. Pasobra Bouman ta bisa ku na 2010 a tuma desishonnan robes ora a lanta KPCN, ku ta falta kapasidat, ku e organisashon ta muchu pisá ariba den tòp i ku ta maneh’é muchu na manera hulandes. Asuntunan ku NAPB ta di akuerdo kuné. Mercelina ta orguyoso ku e kuerpo chikí ‘ku moda limitá a logra tene kabes riba awa i ta presta masha bon’.
Maneho di kuerpo di KCPN no por a kontestá e wikènt aki. Djaluna tin un kombersashon kaminda lo papia di e rapòrt di Bouman tambe, e bosero a laga sa.
Outor Gijs van den Heuvel