Polis na Boneiru – potrèt di archivo: Belkis Osepa
KRALENDIJK – Maneho di Kuerpo di Polis di Hulanda Karibense (KPCN) ta konsiente di e importansha di integridat den kuerpo di polis. Asina maneho di e kuerpo ta bisa den un reakshon kòrtiku riba e rapòrt ku a sali wikènt ku a pasa di e èks hefe di polis hulandes Gerard Bouman tokante KPCN. “No mester tin diskushon tokante integridat di KPCN . Ta p’esei ta reakshoná alertamente riba kada señal i si ta nesesario nos ta aktua tambe.”
“Kuerpo a tuma nota di e señalnan tokante kestionnan di integridat”, e maneho di kuerpo ta bisa. “Liá na esaki e kuerpo lo laga hasi un investigashon di kultura lokal relatá na e normanan i balornan ku ta pertenesé na un organisashon di polis, relatá na nan propio kòntèkst lokal.”
Outo di trabou
Bouman den su raport ta deskribí banda di fayonan organisatorio tambe hopi violashon di integridat pa miembronan di e kuerpo, entre nan uso privá di outo di trabou. Esaki lo ta sosodé desena di aña kaba i p’esei ta aseptá lokalmente. Bouman ta haña ku e kos aki mester para.
Maneho di kuerpo ta para tras di e reakshon di presidente Charles Mercelina di sindikato di polis NAPB BES ayera, ku lo sigui desaroyá e protokòl di integridat i ku , maneho di KCPN ta bisa, ‘enfátikamente lo bai forma parti di kultura di e kuerpo’.
Otro pregunta manera e rekomendashonnan di Bouman pa un otro organisashon ku esun di KPCN lo no kontestá aworaki.
‘No verídiko’
Pero e parlamentario hulandes Ronald van Raak (SP) ta yama e rapòrt ‘no verídiko’. “Bouman mes ta envolví den un investigashon di korupshon, esaki no por den un investigashon di integridat. Tin motibu si pa wak e organisashon bon i no solamente ku wowo hulandes. Ta trata kon nos por haña un kuerpo di polis bon ku rekurso limitá.”
Van Raak no sa eksaktamente ken lo mester hasi e investigashon pero en todo kaso ‘un hende ku tin eksperensia na e islanan’.
Outornan Gijs van den Heuvel i Pieter Hofmann