Defensor di mucha Margrite Kalverboer na Saba – potrèt: Kinderombudsman
HILVERSUM – E situashon rònt di derechi di mucha den e munisipionan karibense ta preokupante, e Defensor di mucha ta haña durante su bishita na e islanan. E problemanan mas parti ta tokante pobresa, enseñansa i violensia doméstiko.
“Hulanda Oropeo mester tuma su responsabilidat”, Kalverhoven ta bisa na NPO Radio 1. E ta mira ku gobièrnunan i instanshanan ainda ta mustra ku dede riba otro sin tuma hopi responsabilidat.
Un rapòrt di Unicef di 2013 a konkluí ku riba diferente manera ta violá e Tratado di Derecho di Mucha na Boneiru, Saba i Sint Eustatius.
Pobresa
E konsekuenshanan di pobresa ta grandi, e ta ripará. “Tin hopi desigualdat, kompará ku e situashon hulandes”, Kalverboer ta bisa durante su bishita. Por ehèmpel ta difísil pa mama soltero bai wes pa eksihí alimentashon. “Hopi bia nan tin dos trabou, loke ta pone nan pega masha hopi bia. Nan no por ni hiba e muchanan skol nan mes, pasobra nan ta sali kas for di seis or di meinta.”
E problema di violensia doméstiko tambe a hala su atenshon. “E muchanan mes no ta papia tokante di esaki dje lihe ei pasobra nan ta fiel na nan mayornan. Pero nan ta konta si kiko otro mucha ta pasa aden.”
Promé bishita na Hulanda Karibense
Ta promé bia ku Defensor di mucha ta bishitá tur tres e munisipionan karibense. Kalverboer entre 17 i 24 di novèmber lo bishitá entre otro skolnan, ayudo di mucha i mandatarionan. E ke papia espesialmente ku e muchanan mes.
Outor John Samson