Oswald Melcherts – potrèt: Gijs van den Heuvel
KRALENDIJK – “Kaya Grandi ta un desaster”, Oswald Melcherts ta suspirá tokante e aksesibilidat di e pakusnan den kaya grandi di Boneiru. E ta den un ròlstul i e ta sekretario di e Grupo di Trabou Aksesibilidat Físiko Boneiru (WFTB). Tòg e no ta negativo tokante e desaroyonan riba e tereno aki. “A hasi hopi kaba pero bo mester keda sinta nan tras.”
Na 2006 e a lanta e fundashon Minusválido Boneiru (MiVaBo) i na 2012 e grupo di trabou a kuminsá; un koperashon ku diferente otro fundashon. Den e añanan ei tabatin diferente éksitonan, pero ainda tin hopi pa mehorá.
Independiente
Melcherts mes ta biba den un kas adaptá kompletamente na su situashon. E tin espasio pa move ku su ròlstul den kas, sostennnan ku e por usa pa hisa su mes i un lèft den ducha. Riba e manera aki e por biba independientemente.
Pafó riba kaya no ta posibel tur ora pa yega independientemente kaminda bo ke ta. Transportashon ta bon reglá. E kompnia RoRo ta regla transpòrt ku taksi i tin un kòntrakt di kuido ku e Ofisina di Seguro Mediko (ZVK). Melcherts ta un poko positivo tambe tokante e bulevar renobá i e aeropuerto (BIA). “Promé ku e trabounan a kuminsá nos a palabra henter e plan huntu ku henter e tim”
Ainda mester karga pasahero minusválido pa nan por drenta i sali avion, tin bia asta mester mara nan. Un ramp ku por kore ta e solushon. Esaki ta bon pa ròlstul i pasahero ku por kana. “Si turistanan sa ku tin algu asina gustosamente nan lo bini Boneiru”, ta e konvikshon di WFTB.
Inaksesibel
Melcherts tin un ke otro di remarká si tokante e bulevar. “Mester sera e rantnan rondó ku tin rònt di e palunan.Aktualmente tin muchu tiki espasio, si bo stür malu banda di un palu di mas di shen aña bieu, bo ta kai na awa.” E pakusnan den Kaya Grandi por lo pronto ta keda inaksesibel pa un grupo di habitante minusválido ku ta kresiendo, kaminda no mester lubidá e turistanan tampoko, segun kordinadó Ria Evers-Dokter. E ta mustra riba e problemanan pa koredó di ròlstul i hende siegu riba e asera di Kaya L.D. Gerharts. Semper tin un trùk pará einan riba asera, di un bendementu di mueble ku tin ei i e asera mes ta ta yen di buraku i otro opstákulo. “Nan ta bisa ku nunka bo no ta mira hende minusválido den siudat. Bo ta haña ta straño?”
Un éksito di e grupo di trabou ta e renobashon di Pasang Grahan, e edifisio di Eilandsraad. “A kosta hopi trabou pero e left a bini. Kuné bo por bai ariba nèchi nèchi”, Melchert ta bisa.
Konferensha
E soño di un Boneiru 100% aksesibel ainda ta hopi leu. Ta p’esei 8 di novèmber WFTC ta organisá un konferensha kaminda a invitá tur organisashon i gobièrnu. E speransa ta ku esaki lo trese un bon maneho.
Outor Gijs van den Heuvel