Playa di Lagun a laba bai laman – potrèt Anneke Polak
WILLEMSTAD – Komo ku diferente dam a kibra, e parti mas grandi di Bandabou ta sufri di hopi molèster di awa. Na Lagun despues ku un dam a kibra hopi kilo di santu i tera a laba bai laman.
Na diferente lugá palu a kai despues ku e tera a laba kita for di e raisnan. P’esei pa un tempu kòrtiku no por a pasa mas riba diferente kaminda. “T’asina ta forsa di awa”, minister di Planifikashon Espasial Suzy Camelia-Römer a reakshoná. “Nos ta deliberando ku Medio Ambiente i Naturalesa i ku Hustisia, ku servisio meteorológiko, polis i brantwer. Pasobra awa ta kai konstantemente, nos ta alerta.”
La Niña
Ta ferwagt ku e áwaseru pisá aki, ku ta kousá pa La Niña, lo sigui dura mas. Fred Capello di Meteo: “Nos lo keda ku wer di awa te ku djaluna. Despues e chèns riba yobida lo bira ménos den e dianan ku ta sigui, pero probablemente lo no keda seku. E tera ta kasi saturá hopi kaminda e p’esei e no por tuma mas awa.” Minister tambe ta tene kuenta ku esaki. “Pero nada no ta kambia asina lihé manera wer. Ku eksepshon di hende muhé.
Oranan largu e santu di Playa Lagun i Playa Jeremi a laba bai laman – potrèt Anneke Polak
Santu den laman
Na Playa Jeremi i Playa Lagun santu i tera a laba bai laman oranan largu. “Pasobra e dam na Lagun a kibra e awa ta bai laman mésora. Nos no por hasi nada kontra esaki aworakí. Sí nos tin lunanan kaba ta traha ku un tim ku ta traha na protekshon di e faha di kosta. Nos ta wak e kambio di klima, infrastruktura di e tera, urbanisashon i tur otro faktor ku tin influensha.”
Na kaminda pa Westpunt na altura di Asension tambe un dam a kibra pa motibu di áwaseru pisá – potrèt: Anneke Polak
Minister ta pidi públiko pa no partisipá na ‘turismo di desaster’. “No bai kaminda bo no tin nodi di bai”. Pasobra e awa lo sigui kai, Camelia-Römer ta prekupá tambe pa Bandariba. “Ei tambe tin parti kaminda e awa ta oumentando, ta wak e situashon ku masha atenshon. Komo gobièrnu nos no por evitá ku e awa lo bin subi mas haltu, manera na Aruba poko dia ei, pero mi ta prekupá si.”
Outor Anneke Polak