Sint Eustatius ker a keda den Antia, pero komo ku esaki no tabata un opshon, e isla a bira un munisipio di Hulanda – potrèt: Elisa Koek
DEN HAAG – Minister Plasterk (Relashonnan den Reino) no ta pèrmití e diferente ministerionan pa tin kontakto direkto ku e munisipio karibense Sint Eustatius. E motibu ta un pleitu ku a lanta atrobe ku gobièrnu lokal.
Esaki a sali for di korespondensia entre e ministerio di Asuntunan Interior i Relashonnan den Reino (BZK) i gobièrnu insular. Nan tin sigur un aña kaba ta pleita tokante e maneho finansiero di e munisipio i kumplimentu ku kompromiso.
No tin kontakto ni bishita di trabou
Ámternarnan na Den Haag por lo pronto no ta pèrmití di tin kontakto direkto ku e mandatarionan i ámtenarnan na Sint Eustatius. Ámtenarnan di Den Haag mester salta e isla tambe ora nan hasi un bishita di trabou na e otro munisipionan karibense Boneiru i Saba. Plasterk ta skibi ku e ta tuma medida, pasobra ‘mirando e desaroyonan’ e no por konfia ku Sint Eustatius lo kumpli ku su palabrashonnan. “E situashon tin mi masha preokupá.”
E bòikòt nobo ta sigui un karta rabiá di lider di koalishon Clyde van Putten. E ta kulpa minister Plasterk ku ta nèt su ministerio no ta kumpli ku palabrashonnan, loke a pone ku su isla aktualmente ta pará ketu pa loke ta e nivel di gobièrnu. Tambe BZK segun Van Putten intenshonalmente lo no a duna pèrmit pa paga salarionan di ámtenarnan.
Diferente bia a trata di haña un reakshon di e boseronan di Minister Plasterk sin resultado. Entretantu riba e isla tur hende a kuminsá ta eksitá. Djárason a manda diputado Astrid McKenzie kas ku un moshon di deskonfiansa ku a aseptá.
Mediado ta bai Hulanda
Basta tempu kaba relashonnan no ta muchu bon entre gobièrnu lokal i ministerionan na Den Haag. Na yüni si 2015 minister Plasterk pa promé bia a disidí di tene un bòikòt gubernamental. A dura mitar aña te ora ku minister a drenta kombersashon bèk ku gobièrnu lokal. Ainda Sint Eustatius ta pará bou di vigilansia finansiero severo. No por hasi niun gastu sin aprobashon di Den Haag.
Siman ku a kaba Representante di Reino Gilbert Isabella a bula bai Hulanda pa un deliberashon kumbre ku minister Plasterk. E mester bai intermediá pa gobièrnu julandes. Si e diferente ministerionan mester tin kontakto tòg ku e isla, bou di òrdu di BZK por lo pronto esaki por sosodé solamente via Isabella.
Outor John Samson