E hóbennan tin varios aña ta partisipá den e siman di beisbòl – potrèt: Deya Mensche
WILLEMSTAD – Pa pelotero Diegomar Markwell i Ozzie Albies, ta e muchanan ta para sentral durante e siman di beisbòl i ta e un di e poko momentu ku nan por duna bèk na esnan más hóben. Pa Ryjeteri Merite i Nathan Castillo, tur dos di 12 aña, ta un eksperensia inolvidabel pa enkontrá nan heroenan.
Ret Karibense tabata presente ora e hóbennan a konosé nan pelotero faborito i por a hasí nan varios pregunta pa mehorá nan wega.
Den ‘dugout’ di Tio Daou Bòlpark, Ryjeteri i Nathan a topa ku Diegomar Markwell i Ozzie Albies, unda nan a saka varios potrèt i por a kòmbersá kon pa mehorá nan wega.
Hóbennan
Nathan kièr a sa kon Diegomar ta tira su balanan más mihó. “Boso ta yòn ainda, pues lo mi rekomendá pa traha riba boso Fastball i Change Up, ku ta dos bala ku boso mester praktiká más tantu sin esaki hasí daño na boso èlebog i skouder”, Markwell, (36) a splika. E hóbennan tin varios aña ta partisipá den e siman di beisbòl, i ta regresa tur aña paso nan ta siña masha tantu di e klínikanan. “Ami tin dos aña ta partisipá”, Nathan a bisa, “i ami tin tres aña ta bini”, Ryjeteri a añadi.
Juraimy Profar winner Derby – potrèt: Deya Mensche
Banda di Albies i Markwell a partisipá varios hungadó ku ta destakando den top di béisbol internashonal manera Didi Gregorius, rumannan Jonathan i Sharlon Schoop, Jurickson i Juremi Profar, Shairon Martis, Kevin Kelly, Sherman Lacrus, Denzel Richardson, Kevin Moeskiet, Kalian Sams, Carlton Daal, Darren Seferina, Hainley Statia, i Chris Garcia. Promé ku e Homerun Derby kulminante, tabatin un wega di basilon entre e profeshonalnan i varios artista lokal ku a mustra kiko nan tambe tabatin aden. Pero ta Jurami Profar, pelotero di High Desert Mavericks, a proba di ta e rei di homerun absoluto di Curaçao Baseball Week 2016.
Varios workshop
Durante e di kuater edishon, nos estreyanan di baseball a duna diferente klínika na e muchanan di Little League i e coachnan a haña varios workshop di entre otro Jerry Weinstein di Colorado Rockies i John Vodenlich di ISG, ekspertonan internashonal di e deporte. Patrosiná pa Blue Bay Resort i enkabesá pa Hensley Meulens i Ben Thijssen, a kuminsá e siman deportivo ku un komementu inspirashonal unda e ‘short stop’ di New York Yankees, Didi Gregorius, estreya internashonal di atletismo, Churandy Martina, i ganado di varios premio Grammy, Pernell Saturnino, a konta di nan trayekto pa éksito riba nivel internashonal.
Potrèt: Deya Mensche
Nathan ta un di e 12 muchanan ku a keda selektá pa otro aña partisipá den un klínika na Miami, Merka. “Mi ta hopi kontentu”, Nathan a splika ku un sonrisa. Albies (19) kende ta un dje prospekto nan di Braves, a konsehá e Nathan pa presta bon atenshon riba loke ta pasa riba vèlt espesialmente na Miami i semper enfoká riba e kosnan positivo ku ta tumá lugá pa asina nan hungá e wega korektamente.
“Ami ta kere ku mi tambe por yegá leu den beisbòl”, Nathan a deklará ku siguransa. “Mi wega ta bira tur dia más mihó”, e hóben a finalisá.
Outor Deya Mensche