Prizòn Pointe Blanche – potrèt: Hilbert Haar

Prizòn Pointe Blanche – potrèt: Hilbert Haar

PHILIPSBURG – Direktor di prizòn Edward Rohan ta studia e kontenido di e raportahe mas resien di prizòn Pointe Blanche di Sint Maarten. “E opstákulo di mas grandi ta falta di plaka.”

Pero e komishon di kontinuashon no ta haña falta di plaka un motibu bálido i tin hopi krítika riba e direktor di e prizòn. “E direktor no ta mustra sufisientemente ku e ta logra resultado i mehorashon”, tin pará den e raportahe ku minister Ronald Plasterk di Relashonnan den Reino a manda pa Tweede Kamer kuminsamentu di novèmber. E komishon ta apelá na minister di Hustisia tambe pa intervení fuertemente. Rohan: “A entregá diferente proposishon den e área di personal i medionan, pero nos ta warda aprobashon. Tur kos ta kosta plaka i te dia ku nos haña lus bèrdè nos mester yuda kurpa ku loke tin.”

Personal
Pointe Blanche segun e rapòrt tin muchu hopi trahadó, pero muchu poko di nan ta traha den e prizòn. Rohan: Nos a drecha esaki parsialmente. Personal ku no ta riba lista di pago mas a bai. Yenamentu di e luganan bashí ku a bini i e edukashon di e kandidatona ku ta kapabel ta bai slo. E training ta kuminsá na mart 2017 atrobe”, e direktor ta suspirá. “Tur kos ta tarda aki.”

Tur kos no ta bai bon tampoko entre e personal ku t’ei. Rohan: “Tin bia ta difísil pa papia ku e supordinadónan.”

Banda di esaki tin muchu poko hende ta traha. “”Ousensia pa motibu di enfermedat ta haltu i ta pone preshon riba esnan ku sí ta traha”, Rohan ta bisa. E direktor ta sospechá ku dòkternan ta komplasiente ora di establesé enfermedat serka trahadónan “No mester deklará un trahadó inkapas pa traha si esaki no ta nesesario.”

E direktor ta enfatisá ku su relashon ku personal ta bon. Un artíkulo den korant di sèptèmber kaminda e personal lo a pidi su retiro e ta hasi komo si fuera ta redu. “Nan a pensa ku mi no ta pone sufisiente preshon riba e minister responsabel, e ora ei mi a splika ku ta espesialmente un problema di medionan finansiero limitá.”For di e tempu ei e personal, segun Rohan, a haña mas komprenshon pa e situashon.

Finansa
No opstante e krítika Rohan ta para ariba ku un empuhe finansiero lo hasi un diferensha real pa e prizòn Pointe Blanche. Promé kos ku e lo hasi si plaka bini disponibel ta tuma wardadó di prezu ku sufisiente edukashon i eksperensha. “Aworaki hopi kos no por pasobra falta e konosementu, manera kiko mester hasi henter dia.”

Segun e rapòrt tin sistema di seguridat esensial manera alarma di kandela i sistemanan di komunikashon pa e personal ku no ta funshoná. Segun Rohan a solushoná esaki, tur kos ta traha. E trabounan tabatin retraso pa motibu di pagonan atrasá.

E krítika riba e komishon di progreso no ta solamente riba e direktor. Minister di Hustisia tambe lo mester aktua ku mas forsa pa haña un grep riba e prizòn. Banda di esaki e komishon di progreso tin un vakatura pa un miembro ku ta representá Sint Maarte. Despues di algun luna ainda no a proponé e persona aki. Minister di Hustisia te aworakí no a reakshoná riba preguntanan di Ret Karibense.

Regla General di Maneho di Reino
Un Regla General di Maneho (AMvRB) tabata obligá Sint Maarten pa mehorá e prizòn. E komishon di progreso despues a indiká ku no tin sentido si no tin progreso òf ni sikiera e deseo pa alkansá esaki.

Na aprel e komishon di progreso a deliberá ku gobièrnu di Sint Maarten tokante e progreso di e ehekushon di e plannan di enfoke. Den e plan a inkluí deadline di e puntonan di mehorashon. E ehekushon di esakinan tambe a haña retraso, segun Rohan pa falta di plaka.

A prolongá e Medida General di Maneho pa di tres bia, despues ku miembro di parlamento di VVD André Bosman a entregá un moshon pa esaki. Segun Bosman no por a terminá e medida pasobra no a logra e metanan. Pa e motibu ei e komishon ta sigui ku e trabounan manera ántes i a pone deadline nobo pa e puntonan di mehorashon.

Outor Pieter Hofmann