A sigurá besindario di Fort Oranje durante e seshon – potrèt: Gijs van den Heuvel
KRALENDIJK – Na final di un seshon pro forma ku poko sorpresa den e kaso Drum e tres sospechosonan a kousa un elemento inkomun. Nan a ekspresá duele pa loke a sosodé dia 17 di ougùstùs; polis Ferry Bax a pèrdè su bida den e investigashon di un atrako na un kas na Sabadeco.
Ounke e sospechosonan parsialmente a duna deklarashonnan kontradiktorio nan no a ninga di ta envolví den e kaso. Remarkabel segun bosero di Ministerio Publiko Norman Serphos (OM) tabata ku niun di e abogadonan no a pidi pa skòrs e detenshon di nan klientenan.
Despues ku fiskal Antoinette Doedens a rekapitulá e státùs di e investigashon i defensa a establesé nan deseonan pa e investigashon, wes Marije van den Enden a pidi e seis sospechosonan presente si nan tabatin mas deseo ainda.
Ekspreshon di repentimentu
E sospechoso Nitzael Padilla Gutierrez a lanta para: “Mi ke sa ku kua arma a tira e polis. I mi ke pidi despensa na e famia, e habitantenan di e kas i kontra pueblo di Boneiru i gobièrnu hulandes.” El a añadí ku e no a tira Bakx mata i ku ta duel e masha. “Esaki no ta loke mi tabata ke men ku mi pregunta”, wes Van den Enden a bisa, “pero tin mas hende ku ke bisa algu?”
Despues William de Jesus Padilla Marin i Francisco Carrasquel Alfonso a ekspresá nan duele i a sigurá ku nan no a tira. “Mi tabatin un arma di kandela si, pero solamente pa mi por hui”, De Jesus Padilla Marin a bisa. E sospechoso Carrasquel Alfonso a pidi despensa pa e trouma ku el a kousa.
Partner Anita Smits van Bakx, ku tabata presente den e sala di korte chikí ku seguridat pisá na Fort Oranje, no a reakshoná na un manera ku por a ripará. Na kuminsamentu di e seshon a anunsiá ku Smits lo entregá un eksigensia pa indemnisashon. E famia atraká tambe ta kontemplá esaki.
Hopi seguridat serka korte – potrèt: Gijs van den Heuvel
Rekonstrukshon 3D
Pa e kaso Drum ta usa un medio nobo nobo, un rekonstrukshon tresdimenshonal. Na februari 2016 a us’é pa promé bia na Amsterdam den un kaso di tiramentu i a asept’é komo prueba. Segun Serphos esaki ta posibel pasobra Boneiru ta parti di Hulanda. No opstante e rekonstrukshon 3D aki e abogadonan Sarah Inderson i Alicia Blonk a pidi pa un rekonstrukshon na e lugá mes. Wes a bisa ku e ke warda te ora e imagennan 3D yega.
E úniko sospechoso ku no a aparesé na e seshon tabata Rachyt Saragoza, bibá na Boneiru. Meskos ku tur e otro sospechosonan ta kulp’é di kometé e atrako i tiramentu di polis Bakx, pero komo úniko tin un keho supsidiario kontra dje, esta preparashon di e atrako i regla alohamentu pa e ko-sospechosonan.
Na e seshon fiskal Doedens a anunsiá ku ta sospechá Saragoza tambe di soborno i trafikashon di hende. Tambe ta añadí kontrabanda di dos kilo di kokaina na e keho kontra S. I algun otro sospechoso.
Ta kontinuá e kaso dia 24 di februari 2017 ku un seshon preparatorio. E tratamentu di kontenido por lo pronto ta planeá di 15 pa 17 di mei.
Outor Gijs van den Heuvel