Sikólogo di mucha i hóben Rhona Eustatius – potrèt: Pieter Hofmann
ROTTERDAM – Hóbennan ku lanta ku mas ku un desendensia kultural ta èkstra vulnerabel. Nan ta kore mas riesgo pa desaroyá problema síkiko i sosial. Esaki sikólogo di mucha i hóben Rhona Eustatius ta konkluí. El a skibi un buki, ‘E relato di mi eksistensia’, pa yuda nan.
E idea ta ku si bo haña bo propio identidat kultural dòbel bo ta mihó protehá kontra sintimentu di por ehèmpel soledat, depreshon i impotensia. Pero hopi di e hóbennan ku un desendensia kultural no hulandes no konosé nan ‘propio kultura’. Eustatius: “Ta masha importante pa haña sa mas di bo desendensia. Esei ta pone ku bo por funshoná den komunidat hulandes mas fásil.”
Eustatius (34) a eksperensiá problema di adaptashon na su mes manera ora ku na edat di 20 aña el a bini Hulanda for di Kòrsou pa studia. “Mi a isolá mi mes masha hopi, mi a bira masha insigur pasobra kosnan tabata traha kompletamente otro na Hulanda. Migrashon no ta solamente trokamentu di kas pero por trese hopi konsekuensha kuné – tambe un òf dos generashon despues.”
Konflikto
E mésun alienashon hopi di su klientenan tambe ta eksperensiá, e ta bisa. “Nèt den adolesensia, ora bo kuminsá desaroyá bo identidat nan ta haña nan konfrontá ku normanan di afó pero tambe djaden. Esaki por trese konflikto, por ehèmpel pasobra mayornan i yunan no ta komprondé otro pasobra nan ta aspirá otro normanan i balornan.”
Diálogo
Si e mayornan òf abuelonan i hóbennan lo a papia di otro su normanan i balornan, lo por a bini un diálogo i un posibel solushon. Ei e solushon ta kuminsá, Eustatius ta rasoná. “Esaki ta kuminsá ora bo investigá e historia di bo famia. For di esaki bo ta bira konsiente kon bo ta liá na bo kultura i bo ta hinka bo mes den e kultura di bo desendensia.
No por krusa tur abismo entre e diferente generashonnan ku nan propio normanan i balornan, Eustatius tambe ta rekonosé. Ta molestoso si mayornan ta keda para rígidamente riba nan kultura di kas. “Ta dependé di otro faktor tambe, pero papia di esaki ta un komienso.”
Historia di famia
Usando tarea di trabou ta reta e hóben pa puntra su famia tokante nan pasado i historia di famia. Eustatius: “Ku relatonan ta konstruí bo identidat. Ta mi intenshon tambe ku esun ku ta traha ku e buki, ta deskubrí ku tin diferente perspektiva.”
E diferente perspektivanan tin bia ta trese bèrdatnan doloroso na kla. No tur mayor ker a keda Hulanda pero a posponé i despues kanselá e regreso. Eustatius: “Hopi bia nan ker a bai bèk, pero e muchanan tabata mas konektá na Hulanda. E hóbennan ta sinti e doló inkonsiente di nan mayornan, pero no por dun’é un lugá miéntras tin bia e ta pasa di generashon pa generashon.” Ta importante pa tantu e hóbennan komo e mayornan i abuelonan bira konsiente di esaki.
“Si mi wak mi mes: ta normal ku despues di enseñansa sekundario na Kòrsou bo ta bai Hulanda pa sigui studia i biba den dos kultura. Ta durante di e estudio di terapia di sistema transkultural mi a kuminsá komprondé mi mes proseso di migrashon.”
Rhona Eustatius a studia sikologia na Leiden, aktualmente e ta terapista di sistema transkultural. E ta traha komo sikólogo di mucha i hóben pa i-Psy De Jutters i pa Centrum Jeugd en Gezin na Den Haag.
Outor Pieter Hofmann