Natasha Gibbs na Schiphol ta moderá e debate entre e yu di Kòrsou Quinlan de Windt i e bonerianu Alfie Vanwyngarden tokante braindrain i remigrashon – potrèt: NTR
SCHIPHOL – Míles di hóben antiano despues di nan estudio na Hulanda no ta bai bèk. Ku e tópiko ta sensitivo bou di hulandes antiano, ta sali tambe den un transmishon djadumingu pasá na NPO Radio 1
E studiante boneriano Alfie Vanwyngarden i Quinlan de Windt di Kòrsou ku a kaba di studia, a hiba un debate pisá tokante remigrashon despues ku kaba di studia na Hulanda. E debate riba social media ta trese diskushon grandi bou di isleñonan.
Antia di ántes ta pèrdè míles di talento bon eduká na Hulanda miéntras tin problemanan grandi rònt di pobresa, korupshon i mal kuido. Tokante e solushon di e problemanan aki a lanta dos kampo.
E kampo Alfie ta haña ku ta un obligashon moral pa tur esnan ku a kaba di studia bai bèk mésora i bai yuda e islanan. Es ku no bai ta un ‘traidó’ i un ‘makamba pretu’. Esnan ku ta keda, e kampo-Quinlan, por lo pronto no ta pensa riba baimentu bèk. Quinlan no ta mira posibilidat riba su isla, pasobra e habitantenan mes ta hasi poko esfuerso pa solushoná problemanan grandi riba e islanan. “Nan ta preferá di ta floho i no traha.” Ademas e no ta haña ku por tene studiante na Hulanda responsabel pa esaki.
Imágen robes
Segun Junya Fecunda, ku ta manehá un ofisina di reklutashon na Hulanda pa e islanan, hopi hóben antiano ta desaroyá un imágen robes. “Riba e islanan hende ta habri si pa kambio, pero no pa e manera ku nos ta bai Kòrsou i bisa nan ku nan no ta hasi e kosnan bon.”
Fundashon Kiva Kòrsou ta trata di konvensé mas tantu talento na Hulanda pa nan mes tuma inisiativa. “Si nos no a bini Hulanda, nos lo tabatin e mésun mentalidat ketu bai. Ke men un bon solushon ta pa no warda te dia e isla ofresé e posibilidat adekuá, pero bo mes krea bo propio posibilidatnan”, Derrick Isenia ta bisa. “No papia krítiko so pero laga nos tuma akshon.”
Alfie i Quinlan ta spera ku nan partisipashon na e programa di Radio 1 Kwesties lo trese un debate nashonal grandi tokante di e tema aki, pa asina bini solushon pa tur dos kampo.
Outornan John Samson i Natasja Gibbs