Courtyard Marriott ta e promé hotèl na Boneiru di un kadena internashonal – Potrèt: Gijs van den Heuvel
KRALENDIJK – Ku hopi entusiasmo direktor Maurice Adriaens di Tourism Corporation Bonaire (TCB) fin di òktober a habri e temporada nobo di krusero. El a bisa ku Boneiru lo bin haña un oumento supstansial den kantidatnan di turista krusero, i el a menta e sifra 400.000.
Luna ku a kaba tambe a lansa dos proyekto nobo di hotèl i Courtyard Marriott a habri su portanan.
Empleo
Tur ta bon pa ekonomia i empleo. Tòg poko poko ta tende otro zonidu tambe. Asta for di e ramo di turismo mes tin atvertensha ku Boneiru no ta un isla pa turismo masal. Pa falta di playa hanchu di santu Boneiru no mester konsentrá primariamente riba e turista di playa, pero e turismo di sambuyamentu a yega su límite. E kantidat di turista ku ta oumentando por tin konsekuensha negativo pa e kalidat di e naturalesa protehá (di bou di awa).
Marriott
General manager Koen Hietbrink di Courtyard Marriott hotèl ta pensa ku e sektor tin bon idea den ki direkshon turismo mester bai. “Na Bonhata (organisashon di hotel, red.) i TCB tin un ambishon pa desaroyá e produkto Boneiru. No bai solamente pa sambuyá pero tambe pa e universalidat di e isla.”
Na apertura di Courtyard kuminsamentu di desèmber a enfatisá ku esaki ta e promé hotèl na Boneiru di un kadena internashonal i ku esaki ta bon pa e isla. “Nos tin un grupo grandi di wéspet fiel pa nos hotèlnan ku nos por buska pa bini Boneiru tambe.” Pero esaki no ke men ku ta bai den direkshon di turismo masal. “Nò, sigur nò, pasobra e isla no ta kuadra ku esaki.”
Hietbrink ta kere ku e outentisidat i universalidat di Boneiru ta atraé un otro tipo di turista. E no ta niun tiki pro e konsepto di all inclusive, kaminda e wéspetnan no ta baha for di e tereno di e hotèl. “Mi no ta kere den all inclusive, pasobra esaki no ta hasi nada pa e destinashon.”
Turismo di krusero
E turismo di krusero lo sigui krese. Na 2018 na e Zuidpier adaptá por mara e barkunan di mas grandi. E ora ei por ehèmpel Disney Cruises tambe por yega na e isla. Esaki ke men ku riba sierto dia tin 6000 turista ta kana rònt riba un dia, ounke no ta tur pasahero ta baha for di bordo. Huntu ku e turistanan ku ta bin sambuyá esaki ke men ku banda di ambiente den sentro di Kralendijk lo tin hopi preshon riba un isla ku apénas 20.000 habitante.
Preshon riba ekosistemanan
E preshon aki a kousa problema kaba den sierto área di e parke di bou di awa, Wijnand de Wolf, manager di Bonaire National Marine Park, ta bisa. “Ecosistemanan tin un sierto kantidat di peso ku nan por wanta.”E ta mustra riba Klein Bonaire i Lac, wetlands protehá, ku ta ‘bou di preshon’ pa motibu di e hopi bishitanan. De Wolf ta vigilá e oumento di turismo krusero tambe: “Nos mester traha plan pa esaki.”
TCB tambe ta konsiente di esaki. Segun Adriaens ainda tin sufisiente espasio pa krese den ‘turismo di riba tera’.
Outor Gijs van den Heuvel