E lugá di tira sushi di Parkietenbos a krese bira un ‘mònster’ segun habitantenan – potrèt: Sharina Henriquez
ORANJESTAD – Gobièrnu ta primintí di poko poko sera e lugá di tira sushi di 70 aña di Parkietenbos for di otro aña i san’é. Pero habitantenan ke mira esaki pretu riba blanku promé.
“Mi a nase i lanta aki 42 aña pasá. Kada kuater aña nan ta pasa. Partidonan polítiko, mi a mira tur koló pasa for di na chikí. I tur hende ta bini ku e mésun relato: nos ta bai sera e lugá di tira sushi. “Ke men sòri, ami no ta kere”, habitante Maribèlle Tromp ta bisa.
Plaka pa sanashon
Alan Howell, kordinadó di medio ambiente di e minister responsabel Mike de Meza ta bisa ku di bèrdat ta traha na un plan. Pero e seramentu di e lugá di tira sushi lo dura hopi aña ainda, e ta rekonosé. Ademas niun kaminda, ni den presupuesto, no a reservá plaka pa esaki. Pasobra sanashon ta bai kosta miónes di florin. “Si gobièrnu mes no tin e plaka, lo e pidi finansiamentu. Ki ora esaki lo sosodé i ta sigur? Mi no por bisa. Ta polítiko nan ta. Ta p’esei ta bon ku e habitantenan ta sigui pone preshon.
Doló bieu
Den 70 aña e lugá di tira sushi di Parkietenbos a krese bira un ‘mònster’ ku segun e habitantenan di e bario einan ku yama Simeon Antonio. Den kurso di añanan tabatin diferente inisiativa di habitante pa fòrsa gobièrnu di bini ku un solushon. Pero te awe esaki no a sosodé.
Tromp mes, ku ta traha komo epidemiólogo na Directie Volksgezondheid, ta bisa ku e konsekuensianan pa salu ta riparabel kaba: tin mas mucha ku astma den e bario. Su yu muhé tambe tin astma no di nasementu. “Ántes nos tabata laga e bentana habrí ora e tabata drumi den su wig.”
Kanser
E tin un bon amiga tambe ku ta biba den su kaya ku tin un forma di kanser poko komun, ku dòkternan ta kere ku ta kontakto ku materia tóksiko ta e kousa. Pero no tin un relashon direkto entre e lugá di tira sushi i enfermedat den bario, Tromp ta atmití. “Pesei mester bini un investigashon tambe. Pero den tur e añanan ei mi no a mira ku na Salubridat Públiko ta mira e problema serka nos komo prioridat.”
Tromp i su kasá Robert Wever ta konta ku último añanan e situashon a bira insoportabel. Kasi tur dia tin kandela. Esei ta pasobra no ta parti e sushi i e reakshonnan kímiko ta kousa kandela di mes. Pero esun ku ta manehá e tiramentu di sushi, Selimar, mes ta sende e sushi na kandela pa traha espasio riba e lugá di tira sushi.
“Nos ta pensa di muda”, Wever ta bisa. E ta masha preokupá pa loke nan ta inhalá tur dia na material dañino. Nan ta yama polis i brabtwer hopi, pero nan no ta bini. “Ta muchu peligroso pa su hendenan, e komandante di brantwer a bisami”, Tromp ta konta. Wever ta bisa ku gobièrnu no ta tuma e problema basta serio. P’esei huntu ku otro habitante nan a manda un karta kaminda nan ta pone Selimar i gobièrnu responsabel pa daño, entre otro na nan salú.
Outor Sharina Henriquez