Rumannan Jonathan i Sharlon Schoop – Potrèt: Deya Mensche
WILLEMSTAD – Famia i hermandat ta balornan ku ta para sentral pa rumannan Sharlon i Jonathan Schoop. Ambos peloteronan profeshonal ta hunga pa Baltimore Orioles, Jonathan pa tres aña den Liganan Grandi, i Sharlon pa tres aña den Triple A.
Ambos ta wak bèk riba un 2016 eksitoso, unda Sharlon a keda yama pa Grandes Ligas pa algun dia, hasiendo su chensnan pa subi permanentemente más grandi. Si esaki sosodé lo ta promé biaha den nos historia ku dos ruman ta hunga pa mes un tim den Liganan Grandi.
Deya Mensche ta papia ku rumannan Schoop
Jonathan
Jonathan di su banda tambe ta satisfecho, unda ela hunga tur 172 wega i a buta sifranan sólido. Pero apesar di tur nan éksito, tur aña di nobo rumannan Schoop ta regresa Kòrsou durante nan vakashon di kuater luna, pa pasa e temporada rondoná pa famia i amigunan. Sharlon, kende a regresa na su posishon di short stop, ta spera ku den 2017 e por haña otro oportunidat pa regresa Liganan Grandi. “Mi no ta tira falta riba nada, pero leshon a bati mi hopi den mi karera. Aktualmente mi tin 13 aña den e liganan menor”, ela splika.
Jonathan no ta preokupá ora hende kompará e ku su ruman ku otro. “Si bo bisa mi ku e ta más mihó ku mi, mi ta bisa bo si, paso e ta mi ruman. E rivalidat no por eksistí entre nos, paso mi no por bai kontra mi ruman”, ela bisa. Sharlon ta konta kon un manager a yega di puntra Jonathan kiko ta e diferensia entre nan dos. “Ela kontesté ku e chèns ku ami a haña, Sharlon no a haña ainda”. Jonathan ta optimista ku un dia su ruman lo subi Liganan Grandi. “E ta un bon pelotero i tin hopi eksperensia, paso ela pasa den hopi kos. Fo’i dje m’a wak i siña. E tin di keda trankil i keda hasí su bèst i si e mester pasa, e lo pasa”, Jonathan a añadi.
Sharlon
Según Sharlon, bida di beisbòl no ta nada fásil i bo no tin masha tempu pa bo mes. “Bo ta hasí asina tantu sakrifisio pa beisbòl, mane bo hubentut, skol, tempu liber i niun montante di sèn no por kumpra esei bèk”, ela splika. Tambe Sharlon ta konsehá mayornan di aspirantenan di beisbòl, pa negoshá un bon ‘signing bonus’ ora timnan profeshonal mustra interes den nan yu. “Bo no sa nunka unda su suerte ta, i si algu bai malu e mucha tin algu pa kai bèk riba dje”, ela splika. Tambe e pelotero a enfatisá ku ta más importante pa e coachnan desaroyá e wega di e muchanan, na lugá di enfoká riba ganamentu so. “Mester kuminsá hinka más tantu sèn den beisbòl, paso e hóbennan ta yega más leu ku n’e”, ela splika. “P’esei mester pusha beisbòl, porta por kreá un skol di beisbòl pa desaroyá e muchanan más mihó”, Jonathan a splika.
Sta. Maria
Ora bo yega serka famia Schoop na Sta. Maria, bo ta kai den un ambiente total, unda varios amigu di bario i famia ta kongrega pa kòmbersá di aktualidatnan di tur dia. “Nos a lanta huntu i ta hasí tur kos huntu, di deporte te salimentu”, Jonathan a splika. “Ta Sta. Maria City i nos ta orguyoso di nos bario”. Según rumannan Schoop, ora bo ta riba kos positivo, bo mester keda riba dje.
Outor Deya Mensche