Rodrigues ta bisa ku e hòspital nobo sigur no ta trata solamente di un edifisio bunita i ku e kalidat di kuido ta pará haltu riba agènda.Potrèt: Elisa Koek
WILLEMSTAD – A skòrs spesialista médiko Michel Berry por lo pronto. Motibu ta su manera di trata. Segun Inspektor di Salubridat Gersji Rodrigues Pereira pashèntnan ku tabatin mester di kuido, no a haña esaki (na tempu). Na e departamento di sirugia kaminda Berry tabata traha, awor ta tuma medida.
Segun Inspektor di Salubridat Gersji Rodrigues Pereira tin protokòl na vigor na hospital pa minimalisá insidente, pero por drecha hopi ainda. “E realisashon ku kosnan mester bai diferente i mihó a kuminsá penetrá”, Rodrigues Pereira ta bisa. “Nos ta spera di ehekutá e mehorashonnan aki promé ku Hospital Nobo Otrobanda (HNO) ta kla.”
Spesialista médiko Berry tabatin mal nòmber basta tempu kaba. Na 2013 Ret Karibense a reportá tokante morto di Julio Martina despues di un operashon di hasi stoma mas chikí ku Berry a hasi. Despues di e operashon Martina no por a hasi nada mas su mes i e tabata biba riba kuminda líkido; Berry tabata nenga esaki. A bolbe atmití Martina den hospital, kaminda a bin sali ku tabatin un lèkmentu pa motibu di un asina yamá ‘poortbreuk’; zür di stoma i kuminda tabata resultá den su barika. Despues di dos operashon mas el a fayesé. E famia ku a keha despues no a sinti ku Inspekshon i minister di Salubridat di e tempu ei, Ben Whiteman, a tuma nan na serio.
Medidanan sufisiente
Inspector Rodrigues ta enfatisá ku e Konseho di Direkshon tin responsabilidat final segun lei pero ku Inspekshon por intervení si. “E Konseho ta tuma e konsekuenshanan pa un spesialista médiko. Si t’asina ku e Konseho no ta tuma medida òf ta tuma medida insufisientemente, eventualmente nos si por.” Rodrigues ta bisa ku e medidanan kontra Berry segun Inspekshon ta sufisiente.
Na e departamentu di Siruhia ta tuma medida riba término kòrtiku i largu. “Pa esaki lo atraé ekspertisa eksterno, lo bini un investigashon pa traha un plan nobo.”Inspekshon ta satisfecho tambe ku e medidanan ku a tuma, pero lo monitòr si, si ta ehekutá e medidanan bon.
Mehorá
Pa evitá insidente asina, tin protokòl den hòspital. Hòspital ta monitòr e protokòlnan primariamente, pero Inspekshon di Salubridat ta investigá i ta motivá pa midi e output tambe. “Pasobra esaki ainda ta poko desaroyá, ta nèt e output ta importante pa asina por buska eror i mehorá e puntonan aki.”
Rodrigues Pereira for di dia el a kuminsá dos aña pasá, ta mira hopi mehorashon kaba si. “Tin hopi atenshon pa awor, na kaminda pa e hòspital nobo, drecha e kalidat, haña tur kos na nan lugá i pa huntu desaroyá promé ku nos pasa pa HNO.”Rodriguez ta bisa ku e hòspital nobo sigur no ta trata di un edifisio bunita so i ku e kalidat di kuido ta pará haltu riba agenda. “E deseo pa tin kalidat i seguridat na òrdu pa e hòspital nobo tei.”
Personal
Un punto di difikultat ta e personal: e pregunta ta si tin sufisiente kapasidat pa introdusi e kambionan deseá. Segun Rodrigues mester wak masha bon unda mester di personal i kuantu mester. “E impreshon ta eksistí ku e kantidat di miembro di personal no ta sufisiente tur kaminda pa e kantidat i e intensidat di e kuido. Lo wak esaki sigur sigur.”
Outor Elisa Koek