Jeroen Recourt i André Bosman di Hulanda, Giselle McWilliam i Humphrey Davelaar di Kòrsou, Rene Herde di Aruba i Rodolophe Samuel di St. Maarten – potrèt: Deya Mensche
WILLEMSTAD – Awe a konkluí e promé IPKO di 2017, unda represéntatenan di parlamento di Kòrsou, Aruba, St. Maarten i Hulanda e reuní den un enkuentro informal, mirando ku Hulanda i Aruba lo tin elekshon e aña akí i konsekuentemente no tabatin un lista di akuerdo. Parlamentario di MAN, Giselle McWilliam, kende a enkabesá e enkuentro, a haña ku esaki tabata eksitoso, paso e bienestar di e hende tabata para sentral.
Entre otro, a trata e buraku di AOV di nos studiantenan, e derecho di inisiativa ku nos parlamento por bai tin den un parlamento di reino i e importansia pa finalmente yegá nan un akuerdo di disputa. Aproksimadamente kuarenta persona a partisipá den e enkuentro, i durante e siman a haña varios presentashon impreshonante, di entre otro CPA i nos haf, despues nan a bishitá e sitio di konstrukshon di e hospital nobo, pa finalmente bishitá Oostpunt pa mira e potensial ekonómiko.
Balor agrega di IPKO
Durante e reda di prensa e delegashonnan di reino a keda representa pa Jeroen Recourt i André Bosman di Hulanda, Rodolophe Samuel di St. Maarten, Rene Herde di Aruba, i Giselle McWilliam i Humphrey Davelaar di Kòrsou. Tur representante a enfatisá e balor agrega di IPKO, i a elogia e manera ameno i agradabel ku e siman a bai, unda nan a siña konosé otro más mihó i a komprondé kiko ta e puntonan di preshon di kada pais. Aruba, Kòrsou i St. Maarten spesífikamente a komprometé nan mes un biaha más pa mehorá e kolaborashon entre e islanan, espesialmente den área di salubridat i transporte aéreo. “Den pasado e kolaborashon no a konkretisá, pero nos a disidí di gara e toro atrobe, paso nos ta wak e nesesidat i posibilidat pa nos traha huntu”, Rene Herde a deklará.
Notabel tabata e ousensia di tres frakshon lokal, spesífikamente MFK, Kòrsou di Nos Tur i Movementu Progresivo. Amparo dos Santos, lider di partido Kòrsou di Nos Tur, a deklará durante un kòmbersashon telefóniko ku Ret Karibense, ku e no ta mira e balor agrega di partisipá den IPKO. Den su opinion, nunka nada realmente konkreto a ser realisá pa nos pais i dia nos dinámiko ku Hulanda kambia, nan lo ta reseptivo pa un dialogo ku ta mutualmente benefisioso. Según McWilliam, nan no a hasi falta, i na su lugá ke enfoká riba tenementu di e liñanan di komunikashon habri, pa asina yega nan entendimentu nan konkreto den reino.
Tambe tabatin un protesta chikí di e frakshon di NO, kende ta bringa pa abolí e leinan di konsenso ku a ser introdusí na 2010. Durante e reda di prensa, Sr. Recourt, a duna di konosé ku durante di e IPKO akí, no a trata e diskushonnan rònt di kambionan di estado estatal ni futuro di Refineria, paso según e parlamentario hulandes, e tópikonan ei mester keda trata pa gobièrnu di kada respektivo pais, i ku Hulanda lo sigui e akontesimentunan ku atenshon.
E siguiente IPKO lo tuma lugá na yüni na Hulanda.
Outor Deya Mensche