E abogadonan arubano Andin Bikker i Lincoln Gomez – potrèt: Pieter Hofmann
DEN HAAG – Abogado i parlamentario arubano Andin Bikker i abogado Lincoln Gomez awe den Raad van State a boga pa ampliashon di e derecho di vota. Nan ke pa tur arubano, yu di Kòrsou i hende di Sint Maarten mayor di edat ku nashonalidat hulandes por vota den elekshonnan di Tweede Kamer.
Aktualmente mayornan di edat hulandes di e paisnan karibense di Reino por vota pa Tweede Kamer solamente si nan a biba dies aña òf mas na Hulanda.
Prinsipio di igualdat
Segun Gomez i Bikker e prinsipio di igualdat ta e kaso. Habitantenan mayor di edat na Hulanda Karibense ku nashonalidat hulandes sí por vota den elekshonnan di parlamento pasobra islanan BES ta munisipionan ekstraordinario di Hulanda. Tòg nan tin nan propio órden hurídiko, sistema di impuesto i unidat di moneda.
Pero dje tantu diferensha tampoko no tin entre islanan BES i paisnan karibense di Reino, Gomez i Bikker ta haña. Meskos ku Aruba, Kòrsou i Sint Maarten islanan BES ta LGO (Paisnan i Áreanan di Ultramar), kaminda derecho oropeo no ta bálido. Remarkabel ta ku votadónan arubano si tin derecho di vota pa Parlamento Oropeo.
‘Legisladó KMR’
Un otro pilá den e argumentashon di Gomes i Bikker ta e papel ku Konseho di Minister di Reino (KMR) ta hunga na Aruba. Segun e dos abogadonan KMR ta responsabel pa e asina yamá legislashon material na Aruba i asina KMR ta un legisladó. Un ehèmpel resien ta e nombramentu kontroversial komo gobernador di Alfonso Boekhoudt, riba interseshon di KMR. Esaki tabata kontra di loke Aruba tabata ke. Pero Aruba no tin influensha riba e desishonnan di KMR, ku ta formá segun elekshonnan di Tweede Kamer. Tweede Kamer tambe ta nombra e formadó di e gabinete.
Bikker: “Solamente den legislashon formal manera Leinan di Reino por delegá bo komo delegado ekstraordinario pero si ta trata di legislashon material manera dekretonan i desishonnan real, kasi nos no tin influensha.”
Segun ministerio di BZK Konseho di Minister di Reino no ta un poder legislativo E outorisashonnan di KMR unabes ta pertenesé na un gobièrnu di Reino, e defensor ta haña.
Korte Oropeo
Dies aña pasá Korte Oropeo a husga ku e influensha hulandes na Aruba ainda no ta hustifiká derechi di vota pa Tweede Kamer. Pasobra e parti mayó di e tarea di parlamento no ta toka Aruba. For di 10-10-’10 e situashon di derecho estatal a kambia di un manera ku awor Gomez i Bikker ta spera riba un otro huisio. Si e biaha aki e sentensia no sali den nan fabor, nan dos ta kontemplá pa un biaha mas kana e kaminda di Korte Oropeo.
E impakto di un kambio den e derechi di vota por ta grandi. Bikker: “Ta dependé di e kosiente elektoral, pero e por nifiká mas o ménos 2.4 asiento. I pasobra nos a yega di tin gabinete di toleransha un òf dos asiento por nifiká hopi.”
Sentensia ta sigui riba 25 di yanüari.
Outor Pieter Hofmann