Frank Gressman – potrèt: Dulce Koopman
WILLEMSTAD – Direktiva di Bethesda ta rekonosé ku mester drecha sierto aspekto di e kuido na e Kas di Kuido. Pero segun Frank Gressman, ta pa motibu di falta di plaka ku no por a resolvé e defisiensianan aki ainda.
Inspekshon di Salú ta determiná pa drecha e nivel di kuido na Bethesda i entretantu a pidi Korte pa intervení pa baha direktiva di e Verpleeghuis ku ta sintá 28 aňa, ku Frank Gressman komo presidente. Mester remplas’é pa un direktiva nobo ku por tuma e desishonnan nesesario pa drecha Bethesda. Frank Gressman, ta konvensí ku Inspektor di Salú, Gersji Rodrigues ta aktua di mala fe.
Dulce Koopman ta papia ku Frank Gressman
Porfin a logra haña hende ku ke forma parti dje direktiva nobo di Bethesda. E mes lo baha komo presidente. Mas pronto posibel lo instalá e direktiva nobo di Bethesda, Frank Gressman a bisa. Durante dje 28 aňanan di eksistensia di Bethesda a logra tene e kalidat na nivel. Ademas ta un echo ku e Verpleeghuis a optené un puesto den nos komunidat.
For di sinku aña pasá Frank Gressman a indiká ku e ta baha komo presidente pa duna hendenan mas hóben un oportunidat pa por traha riba un vishon nobo pa e Kas di Kuido. Gressman ta lamentá ku awor sin motibu por surgi preokupashon serka famia di klientenan di Bethesda, relashoná ku e publisididat ku e asuntu aki a haña. “Te ainda mi no a tende nada pero no ta nada straño ku esaki ta sosodé.”
Gressman ta hasi un apelashon na tur hende pa keda trankil i pa no hasi muchu kaso dje ponensha di Inspekshon di Salú.
Anteriormente Inspektor di Salú a indiká ku riba término kòrtiku hues lo duna veredikto den e petishon pa baha e direktiva di Bethesda.
Outor Dulce Koopman