Minister di Asuntunan Interno i Relashonnan den Reino (BZK) Ronald Plasterk – potrèt: Pieter Hofmann
DEN HAAG – Konseho di Minister di Reino a manda un proposishon pa un areglo di disputa pa Konseho di Estado (KdE). Esaki Minister Ronald Plasterk (Asuntunan Interno i Relashonnan den Reino )a laga sa awe despues ku Konseho di Minister di Reino a kaba di reuní.
Den un konflikto entre paisnan den Reino KDE ta duna un konseho krusial, asina e proposishon ta den dos palabra. E paisnan karibense di Reino anteriormente a preferá Korte Supremo komo e instansha ku ta resolvé konflikto.
Rekonsiderá desishonnan
E areglo di disputa no ta obligatorio tampoko, manera e paisnan karibense tabata ke. Plasterk: “Den kaso di konflikto Konseho di Minister di Reino mester rekontemplá e desishon. Den práktika mi ta kere ku si Konseho Estatal haña e desishon ilegal, mester tene hopi kuenta ku esaki.”
Sinembargo e areglo no ta limitá na disputa estriktamente hurídiko, manera anteriormente (entre otro di e parlamentarionan arubano David Yrausquin i René Herdé) tabata e kaso. Plasterk: “Mi a wak e kos seriamente pero den práktika e parti estriktamente hurídiko i e parti di kontenido semper ta pasa di un bai den e otro. Ora kuater aña pasá nos a haña ku algu mester a sosodé ku e skrinmentu di ministernan na Sint Maarten, e opheshonnan tabata hurídiko i a motivá nan tokante kontenido. No ta parse mi posibel pa establesé matemátikamente: esaki ta un disputa hurídiko i esaki ta un disputa di kontenido.”
Eksepshonnan
Tin kaso di eksepshon kaminda e areglo di disputa no ta bálido. Si presidente di Konseho di Minister haña ku no por posponé e desishonnan, e areglo no ta konta. Plasterk: “Pensa riba kasonan di seguridat. E dos tres disputanan ku nos tabatin último añanan no ta kai bou di esaki.”
E areglo di disputa no ta konta pa desishonnan ku por hasi un Apelashon di Korona kontra di nan. Ora ta trata di Lei di Reino riba kua Konseho di Estado a duna un konseho kaba na Reino, tampoko no por apelá na e areglo di disputa.
Dos areglo di disputa
Plasterk su proposishon pa un areglo di disputa sigur no ta kla pa elekshonnan di Tweede Kamer binidero. KDE mester wak e proposishon e lunanan binidero promé. “Despues e ta bini bèk atrobe serka Konseho di Estado i despues di un trato final e ta bai parlamento”, e minister ta bisa.
Un otro vershon di e areglo di disputa, ku a trata riba algun edishon anterior di e Deliberashon Interparlamentario di Reino (Ipko) den un rekapitulashon kòrtiku ta enserá ku un instansha independiente ta dikta sentensia obligatorio tokante disputa estriktamente hurídiko tokante interpretashon di Statüt. E vershon aki ta diferente for di esun di Plasterk i parse lo no usa esun aki mas.
Plasterk: “Konseho di Minister di Reino a disidí pa manda mi proposishon pa un areglo di disputa pa Konseho di Estado pa asesoramentu, no e otro proposishon. Awor nos ta warda ku kiko Konseho di Estado lo bini, naturalmente nan tambe sa riba kiko e diskushon ta agudisá”
Outor Pieter Hofmann