Zika por kousa mikrosefalia serka un feto – potrèt: Elisa Koek
WILLEMSTAD – Na òktober mi tèst di embaraso tabata positivo. Esaki tabata dies luna despues di e promé infekshon di Zika na Kòrsou i nuebe luna despues ku mi dòkter di kas a duna mi e konseho urgente pa no sali na estado pa por lo ménos seis luna.
Na e momento ei ta konosí ku algun sentenar di hende riba Kòrsou ta infektá ku zika i naturalmente mi no ke kore riesgo. Mi ta troka bodylotion pa spray ku DEET i mi ta buska paña di bisti ku ta tapa bon.
E promé enfermedatnan di embaraso ta dal mi duru. Ta diagnostiká mi ku hyperemesis gravidarum, walmento ekstremo pa motibu di embaraso: mi ta arohá henter dia i mi no por keda pará riba mi pianan.
Terser klase
Esaki ta pone ku, ku nuebe siman na estado, mi ta haña mi na hòspital. Manera mayoria hende na Kòrsou mi ta sigurá via SVB i mi ta resultá den terser klase di Sehos: sin airconditioning, bentana habri si, sin skrin kontra sangura. Ei mi ta pèrdè kòntròl riba e sanguranan, mi no tin ni spray, ni paña ku ta kubri bon.
E promé yobidanan di e temporada di áwaseru ta kuminsá kai. Hòspital ta inundá. Resultado: sangura, tur kaminda.
Tèst di zika
E verplesternan ta bati manera loko pa mata e sanguranan. Nan ta masha alerto tambe: asina mi haña djis un tiki molèster di mi wowonan, nan ta tèst mésora pa zika. Mi partner ta bisa mi despues ku mi no tin zika. El a papia ku dòkter.
Hospital a yena ku awa – potrèt Mariano Luis Heyden
Despues di un siman i mei den hòspital mi por bai kas atrobe, den mi mes kamber di drumi kaminda mi ta drumi seif den èrko. Pa motibu di e hyperemesis gravidarum mi ta haña un ekograma tur siman serka ginekólogo. Ora e pasa den e paki di papel di hòspital, ta resultá ku tin un sorpresa eiden: e tèst di zika ku a hasi den hòspital lo tabata positivo.
Tur deskonfiá mi ta wak mi partner: bo n’ papia ku dòkter? E ta bisa si ku kabes ku konvenshon: “e tèst ei tabata negativo”. Un pániko ta drenta mi kurpa.
Senario di maldishon
Ta sigui un tèst nobo: e bia aki pa antikurpa, pasobra e vírùs no ta den mi sanger mas. ’Urgente’ tin pará riba e ènvelòp. Despues di un siman no tin resultado, despues di dos siman nada ainda. Despues di tres siman, ora ku mi a kaba di toka tur senario di maldishon mas ku shen bia den mi kabes, e resultado ta sali negativo: mi no a haña zika. ‘Un fout chikí…’
Fin di desèmber mi por kana dos tres paso mas leu ku mi kama i e kamber di drumi seif atrobe. Mi a tende áwaseru ta basha for di shelu sí, pero mi no a ripará nada ainda di e nubia di sangura .
Awor ta sali ku tur hende rònt di mi tin zika, mi partner tambe. Esta, asina e ta pensa pasobra e ta tur na punta punta kòrá. Un tèst di solamente su sanger a sali negativo, pero no por konfia e tèst aki mashá segun GGz.
Entretantu mi tin binti siman na estado i e sanguranan ta tur kaminda. Dankidjó por mira mi beibi su kabes bon kla riba e eko i e desaroyo ta bai segun skema.
Riesgo
Pero mi no ta den e zona di peliger mas? Poko tempu pasá ma lesa ku e beibi ku no a nase ainda ainda ta kore peliger. Por lo pronto lo keda un misterio i un faktor di stès èkstra pa tur hende ku ta na estado òf ku ke sali na estado.
Outor Elisa Koek