E fèri Paraguana I – potrèt: website Naviera Paraguana
ORANJESTAD – Naviera Paraguana ainda tin tur intenshon di eksplotá un servisio di fèri entre e península di Paraguana , Aruba i Kòrsou. Segun representantenan di e kompania di barku venesolano na Aruba e kompania ta den kombersashon ku gobièrnunan di tur dos isla.
Esaki Francisco Rodriquez i Luisa Monsalve ta konfirmá. Nan tur dos ta representá e interesnan komersial i di negoshi di Naviera Paraguana na Aruba, Na sèptèmber, durante e seremonia ofishal di re-apertura di e refineria un representante di gobièrnu venesolano a anunsiá yegada di un servisio di fèri entre Paraguana i Aruba.
Tabatin rumornan kaba tokante di e fèri, pero tòg e anunsio a kousa hopi konmoshon. “Tabata trata di mal komunikashon”, segun Monsalve. “E tempu ei nos no a ni papia drechi ainda ku gobièrnu arubano tokante di esaki.”
Sí a kumpra un barku di fèri ku un balor di 10 mion dòler i un kapasidat di 600 pasahero. Tambe a sali notisia ku e kompania di barku a aserka Maneho di Nabegashon na 2013. Ora puntr’é Francisco Rodriguez ta deklará ku Navara Paraguana ya pa algun aña tin e plan di eksplotá un servisio di fèri entre e lugá Guaranao, Aruba, Kòrsou i Boneiru.
Dos siman pasá e miembro di Staten Andin Bikker durante un rueda di prensa a deklará ku Naviera Paraguana lo a desistí di su plannan. E fèri lo a bai hiba un servisio for di i pa Isla Margarita pa e kompania Conferry. Bikker ta esun ku a tuma e inisiativa di un fast ferry entre e islanan ABC. E proyekto ei a pega na un dado momentu pasobra Naviera Paraguana a aserká gobièrnu arubano.
Konseho di minister lo a para e asuntu tanten den relashon ku preokupashon pa e situashon ekonómiko i sosial aktual na Venezuela. Si gobièrnu lo a bai di akuerdo ku e fast ferry entre e islanan, lo tabata difísil pa e nenga un servisio di fèri di i pa tera firme di Venezuela, segun Bikker
Pensando ku Naviera Paraguana a kai afó, Bikker durante e último Deliberashon Interparlamentario di Reino a proponé ku Aruba por partisipá na un proyekto pilot ku awor Kòrsou i Hulanda ta trahando ariba tokante un servisio di fèri entre e Kòrsou i Boneiru.
Tantu Rodriguez komo Monsalve ta ninga ku Naviera Paraguana lo no ta interesá mas. “Ta bèrdat si ku e barku a bai Margarita, pero esei ta pa un lease kòrtiku. Ta trata di un invershon di 10 mion dòler i bo no por lag’e keda para na kantu ta warda. Di e manera aki e kompania ta gana poko plaka i ta tèst e barku tambe bou di kondishonnan ku ta igual na un servisio di i pa Aruba i Kòrsou”, Monsalve ta deklará.
Kombersashonnan
“Entretantu nos ta sigui ku nos kombersashonnan ku gobièrnonan lokal”, Monsalve ta enfatisá. Segun Rodriguez e barku ku anteriormente tabata nabegá na Gresia, lo ta ideal pa e sirkunstansianan marítimo rònt di e islanan ABC. “Mihó ku e fast ferrynan katamaran.”
Outor Ariën Rasmijn
