Margit de Freitas – potrèt: Dulce Koopman
WILLEMSTAD – SSC ta hopi satisfecho ku resultado ku studiantenan di SSC ta logra den region.Na 2012 gobièrnu a kuminsá bèk ku e programa pa duna finansiamentu pa studiantenan por studia den region. E tabata eksistí kaba pero promé ku esei tabatin 15 aña ku e no tabata tuma lugá.
E promé aňa a kuminsá ku un grupo chikí di 67 studiante. Gran mayoria a bai Merka. E kantidat a keda subi kada aña. Mientrastantu tin kasi 600 hóben ta studia den region di kua gran mayoria ta na Merka. E otro pais ku ta sigui ta Costa Rica, despues Colombia i Puerto Rico. SSC no ta na altura ku tin un grupo formal di studiantenan di Regio ku ta frakasa.
Asina Margit de Freitas a bisa den kombersashon ku Dulce Koopman
Margit de Freitas, direktor di SSC ta splika ku resultado dje studiantenan ta mas mihó kompará ku studiantenan ku ta bai Hulanda. Den region e kantidat di studiante ku tin éksito ta hopi mas haltu, el a bisa. Informashonnan den e sentido ku tin un grupo formal di studiante ku ta frakasá den region, ta un asuntu ku SSC no ta na altura di dje.
Ora ku gobiérnu a traha e programa aki, el a proyektá ku mas o ménos 80 porshento lo slag. Esei ta basá riba eksperensha dje tempu aya ku Hulanda kaminda ku ta 45 porshento so tabata slag. Gobièrnu a pensa ku region lo mester ta hopi mas altu i antisipá ku 80 porshento dje studiantenan ta slag. Mientrastantu ta resultá ku 90 porshento dje studiantenan ku bai den Region ta terminá nan estudio ku éksito.
SSC ta pendiente pa tende di gobièrnu si e aña aki tambe e ta haña 4 mion florin èkstra di supsidio pa por finansiá studiamentu den region. Den transkurso di aña e supsidio di SSC a sigui baha. SSC a splika ku e suma aki aki no ta sufisiente pa kubri e programa di region i na 2015 i 2015 gobièrnu a presupuestá 4 mion florin èkstra.
Studiamentu den region ta sali SSC mas tantu sèn ku Hulanda. Pasobra ora ku e studiante ta bai Hulanda, SSC ta paga un parti i DUO ta paga e gran mayoria. Den Region, ta SSC ta pag’é kompletamente. Si e no ta sufisiente e mayornan mester paga loke ku falta.
“E aňa aki ora ku nos a revisá e presupuesto ku parlamento a akordá na desèmber, ta resultá ku e 4 mion no ta aserka. Mi ta kere ku ta un fout”, Margit de Freitas a bisa. Entretantu un karta a bai pa minister di enseñansa, ku e petishon pa den e presupuesto supletorio garantisá e 4 mion pa SSC.
Mientrastantu SSC ta bisa tur studiante ku ke bai den region, pa mas sigur tuma un di dos eskoho pa den kaso ku algu bai robes, e studiante no keda sin un skol ku el a skohe.
E partisipashon aki sinembargo no a influenshá e interes grandi di hóbennan ku ta deseá di bai studia den region, segun De Freitas.
Outor Dulce Koopman