Bùs spesial pa ròlstul – José Manuel Dias
WILLEMSTAD – Transporte den un bùs spesial pa ròlstul por kosta te ku 110 florin pa kada biaha dependiendo di e disponibilidat i tipo di bus. Banko di Seguro Sosial (SVB) ta kubri transporte di pashèntnan riba ròlstul únikamente riba indikashon médiko. Tur lokual ta transporte sosial ta e pashènt mes tin ku paga. Esaki ta afektá e hendenan di ménos rekurso enormemente. Ta bini aserka ku no ta tur fundashon ku ta brinda servisio di transporte di ròlstul ta traha ku tarifanan sosial.
Di e mas o ménos sinku fundashonnan ku ta ofresé servisio di transporte di ròlstul, Stichting Wit Gele Kruis ta esun di mas grandi i komo tal esun ku ta transportá mas tantu pashènt. E fundashon aki ta transportá alrededor di 300 pashènt riba ròlstul pa luna. Pero Wit Gele Kruis ta traha únikamente ku SVB i no ta brinda transporte sosial. “Nos tin kontrakt ku SVB i seguronan partikular pero te ku aworakí no tin un areglo ku e ministerio di SOAW pa paga e tarifa di transporte sosial”. Asina Linda Cijntje-Gout direktora di Wit Gele Kruis a bisa.
Un reportahe di José Manuel Dias:
20 porshentu oumentu
Segun sifranan di Senso 2011 na Kòrsou tin un total di 9988 persona ku problemanan di mobilidat. Ounke e sifranan di CBS no ta hasi menshon di e kantidat di hendenan ku tin riba rolstul, ta kalkulá ku di e dies mil personanan aki, seis mil ta riba un ròlstul sea temporal òf riba un base permanente.
Entretantu e sifranan aki a subi drástikamente i huntu kuné tambe e problemanan pa yega na un transporte di ròlstul pagabel. Entre 2012 pa 2016 Wit Gele Kruis a registrá un oumentu den e kantidat di hendenan riba ròlstul di 20 porshentu.
Outor José Manuel Dias