Ta di spera ku lo aktivá e registro BIG na Kòrsou e aña aki – potrèt: Elisa Koek

WILLEMSTAD – Tres di e diesocho siruhanonan ku a menta den Surgerycuracao.com i Liveincuracao.com ta registrá komo siruhano den e registro BIG hulandes. Entre nan tambe e siruhano ku a pone riba no- aktivo Michel Berry. Mayoria di nan ta registrá komo médiko i na Hulanda lo no por yama nan mes siruhano. Esaki ta konta tambe pa siruhano Patrick Fa Si Oen ku poko tempu pasá a haña mal nòmber.

Un registrashon BIG hulandes no ke men tur kos. Pa médikonan ku por ehèmpel no a studia na Hulanda ta basta mas difísil pa haña un registrashon. Pasobra e registro ta sali for di un diploma hulandes i un rekapasitashon. Ta trahando riba un variashon di e registro na Kòrsou for di 2009, pero esaki tambe tin Hulanda komo direktiva.

Pa haña un registrashon BIG, e médiko mester por prueba ku e tin e papelnan adekuá; e mester traha den e ramo i e mester a sigui enseñansa adishonal. Pasobra ta un registro hulandes, Hulanda mester rekonos’é. Médiko Fa Si Oen anteriormente a bisa den un reakshon ku e ta trahando riba su registrashon BIG.

Re-registrá
E registro BIG di Kòrsou ta bai registrá tur hende ku ta traha den kuido di salubridat i tambe den e trabounan no ta rekonosé manera chiropractor i hende den medisina alternativo. Maneho di e registro lo kai bou di inspekshon di Salubridat. Meskos ku na Hulanda un hende inskribí mester registrá probablemente kada sinku aña. “Pa mantené e registrashon un hende mester tin un diploma rekonosé, mester traha den e área di trabou i sigui enseñansa adishonal rekonosé pa por lo ménos kuarenta ora pa aña.

Médiko ta keda kalifiká
Aktualmente un médiko ku un tempu tabata kalifiká ta keda hasi su trabou tanten ku niun hende no kita su outorisashon. “Ounke e persona kisas no a hasi su trabou pa dies aña, si a dun’é outorisashon, e por kuminsá traha bèk ki ora ku e ke.”

Alcalá ta rekonosé ku esaki ta preokupante i pa e siudadano normal ta difísil pa sa si un dòkter ta ábil. “Un spesialista tin e responsabilidat di tene su mes na eksigensianan legal pa hasi su trabou bon. E spesialista ta traha na un instansia ku ta vigilá esaki. E supervishon final ta den man di inspekshon, ta nan mester vigilá ku e médiko i e instansia ta karga nan responsabilidat.”

Alcalá na 2014 kaba a indiká ku pronto lo aktivá e registro BIG. “Mi ta spera ku lo sosodé e aña aki. Ministerio ta konsiente di e relevansia di e registro.”

Por buska den e registro BIG via e lenk aki.

Outor: Elisa Koek