ORANJESTAD – Pa yegada di un fast-ferry entre Aruba, Boneiru i Kòrsou e prekondishonnan pa mayoria parti ta na òrdu. Pero ta falta un zona ekonómiko i ta resultá masha difísil pa haña un fèri adekuá.

Esaki ta konklushon di e rapòrt di e ofisina di investigashon Icasus Caribbean ku ta den man di Ret Karibense.

A hasi e investigashon Ferry Onderzoek InterCaribbean Expressdienst (FOICE) di e ofisina di investigashon Icasus Caribean bou di òrdu di gobièrnunan di Aruba, Kòrsou i Boneiru bou di supervishon di Fondo Desaroyo Aruba (FDA). E meta tabata pa mapa e prekondishonnan públiko pa un servisio di fèri efisiente.

Oportunidatnan
Icasus a papia ku outoridatnan di haf, duana, imigrashon i polis di tur tres isla. Banda di esaki a papia ku gobièrnunan, ofisina di turismo i sektor privá. Tur partido ta positivo pa yegada di un fast-ferry i ta mira oportunidat den área ekonómiko, pero tambe reto pa loke ta kriminalidat i hende ilegal.

Na Aruba ta teme pa pèrdida di turista, pasobra ta fásil pa nan bishitá otro isla.

Icasus ta konkluí ku den e legislashon aktual i e sistemanan ICT di e servisionan públiko tin sufisiente garantia pa laga e fèri nabegá efisientemente entre e islanan. Parada na kaminda lo no dura mas ku 20 minüt. Ounke ku ainda Aruba mester aseptá legislashon nobo. Nan reglanan di importashon tambe ta diferente for di e otro islanan.

Fred Olsen Express
E kompania di nabegashon spañó Fred Olsen Express shete aña pasá a mustra interes den eksplotashon di un ABC-ferry. For di kombersashon pa e investigashon aki a sali ku entretantu e interes ei a baha hopi. Pasobra formalmente no ta trata di un zona ekonómiko entre e islanan i e sitio di e diferente hafnan lo no ta faborabel.

Na Boneiru mester konstruí un haf nobo ku ta drif. Na Aruba e haf di e refineria na San Nicolas lo tabata ideal, pero e no ta disponibel ainda. E opshon ku a sobra ta e haf di Oranjestad, pero esaki ta tuma 20 minüt èkstra di biahe. E konsekuensha ta ku biaha dos bia pa dia for di Aruba via Kòrsou pa Boneiru nèt lo no por mas.

Mitar di preis di bulamentu
Icasus Caribbean ta konkluí ku ABC- ferry ekonomikamente por tin ganashi. E ofisina di investigashon ta sali for di un tarifa di biahe di mas o ménos mitar di loke un teket di bula ta kosta. E biahe entre Aruba i Kòrsou ta dura dos ora i mei i di Kòrsou pa Boneiru un ora i mei. Pa e fase di komienso ta sali for di un eksplotashon di 1 barku. Ta hasi e ruta entre Aruba i Kòrsou dos be pa dia i di Kòrsou pa Boneiru un be pa dia.

Barku ta skars
Un otro problema ta pa haña un fèri adekuá. Ku e krísis e produkshon di e tipo di barku aki a para añanan largu, miéntras ku pa e motibu di e kresementu den merkado aktual tin un eskases. Ademas tin tiki fast-ferry ku ta adekuá pa nabegá den e region aki, e investigadónan ta bisa.

E tipo di barku ideal lo ta un trimaran, pero mirando e oferta skars i e gastunan ta parse manera kompra di un katamaran ta e mihó alternativo, segun Icasus Caribbean

Outor Ariën Rasmijn