VSO Marieta Alberto – potrèt: Dulce Koopman

WILLEMSTAD – Di e mas o ménos mil muchanan ku tin aktualmente na skolnan speshal, ta pa solamente dies tin un futuro. Esaki ta un realidat hopi amargo ku Sitek ta referí na dje. Segun Lio Plantijn, presidente di Sitek, nos enseñansa ta di mal manera aworakí ku e muchanan yunan di tera no ta haňa berdaderamente loke ku nan tin mester.

Na di dos luga nos enseñansa no ta dirigí riba un vishon òf maneho di gobièrnu. Esei ta nifiká ku e muchanan ta na skol, nan ta haña sierto guia, sierto materia pero no ta dirigí pa en berdat aki 15 aña nan tin trabou garantisá.

Asina Lio Plantijn ta kombersashon ku Dulce Koopman

Durante di un resien reunion ku mayor di alumnonan di e skol speshal avansá Marieta Alberto na Suffisant, mayornan a ekspresá nan preokupashon serio kiko lo pasa ku nan yunan, ora ku ofisialmente nan no ta pèrmiti mas pa bini skol. Esaki ta ora ku nan kumpli 23 aňa.

E situashon ta aun mas preokupante despues ku un grupo di hóben ku mester a kuminsá kore stazje algun luna pasá, no por a hasi esaki , pasobra gobièrnu no a pone e transporte disponibel. Esaki ta minimalisá e chèns potenshal ku e hóbennan lo por tabatin pa haña un trabou i futuro despues ku nan a atkirí sierto eksperensha durante di nan stazje.

“Tabatin mas ku 20 sitio disponibel pa kore stazje”, guia di VSO Marieta Alberto a menshoná. E preokupashon di mas grandi ta pa e sektor di enseñansa speshal pa kua no tin ningun speransa pa e muchanan ku ta sigui e tipo di enseñansa aki.

Lio Plantijn – potrèt: Dulce Koopman

A Sitek tin hopi tempu ta denunsiá e situashon aki. 10 di augustus último Sitek a firma un kombenio ku gobièrnu kaminda por kambia henter rumbo di enseñansa na Kòrsou. Pa logra esaki mester tin boluntat polítiko. Mester realisá kiko ta balor, nesesidat i tambe e importantansia di nos enseñansa.

Durante dje último dékada i mei a hasi inovashon riba tur tipo di skol na Kòrsou, pero no a hasi nada pa enseňansa speshal. Aňa pasá desèmber, Totolica i Fundashon Kontakto, huntu ku Sitek a organisá un konferensha pa papia riba nesesidat dje mucha speshal i ròl dje trahadó den skol speshal.

Kiko mester pasa
Enseñansa speshal tin 50 aňa, pero nunka no a regl’e den lei, pues no tin un lei ku ta regla enseñansa speshal. Pa resolvé e problemanan den enseñansa speshal mester sinta huntu i duna ministerio di enseñansa e tarea i palabra ku ta hinka e lei di skol speshal den otro, Plantijn ta insistí.

Outor Dulce Koopman