E barku fèri Paraguana I – potrèt website Naviera Paraguana
ORANJESTAD – Pa e eksplotashon di un servisio di fèri entre e península di Paraguana i e islanan ABC e kompania di nabegashon venesolano Naviera Paraguana ta sali for di un Memorandum of Understanding (MoU) entre Reino i Venezuela. Esaki ta pará den e buki di informashon ku aña pasá novèmber a duna e stakeholdernan arubano.
Den e buki tin pará ku Naviera Paraguana – banda di e Plan pa Patria ku gobièrnu venesolano a formulá – ta mira e MoU pa koperashon entre e Repúblika Bolivariana Venezuela i Reino Hu;andes komo ‘fundeshi’ di su eksplotashon di empresa.
Na yüni 2013 e minister hulandes di Asuntunan Eksterior Frans Timmermans, su kolega venesolano Elias Jaua Milano, embahador hulandes Johannes van Vloten Diessevelt, promé minister Daniel Hodge di Kòrsou i e promé minister arubano Mike Eman a firma e MoU.
Akiden tin pará ku Reino i e régimen venesolano lo bai koperá den e área di entre otro ekonomia, defensa, medio ambiente, telekomunikashon, transpòrt i siensia.
A palabrá pa lanta grupo di trabou pa tur aña reuní riba nivel atministrativo. Kada dos aña tur dos pais lo a bini huntu riba nivel di minister pa deliberá. Na februari di 2014 e korant di estado venesolano a anunsiá ku e MoU tabata na vigor den e pais.
Na sèptèmber di aña pasá Naviera Paraguana a presentá e barku Paraguana den haf di Guaranao ku e anunsio ku na novèmber e servisio di fèri lo ta operashonal. Na Aruba outoridatnan a deklará ku e servisionan di gobièrnu no tabata kla pa akohé pasahero, ounke ku e outoridat di haf APA si a primintí un lugá pa e fèri mara.
Eman i e otro ministernan a asta ninga di ta na altura di e plannan di e fèri. Na òktober atrobe un outoridat venesolano a anunsiá su yegada durante e re-apertura di e refineria na San Nicolas.
Entre tantu a lease e fèri i e ta nabegá un otro ruta.
Representantenan di Naviera Paraguana na Aruba ta bisa ku te ainda nan ke nabegá pa i entre e islanan ABC.
Outor Ariën Rasmijn