Portrèt: InselAir

ORANJESTAD – Inspektornan hulandes ta bai sostené e inspekshonnan di aviashon na Kòrsou i Aruba temporariamente. E intervenshon aki ta ‘nesesario pa mantené e seguridat di aviashon na un nivel haltu’, sekretario di estado hulandes Sharon Dijksma ta bisa durante un bishita relámpago na Aruba.

E gobièrnunan di Kòrsou, Aruba i Hulanda a sera un akuerdo di koperashon pa esaki. Motibu ta e rapòrt ku e sekretario di estado ku ta responsabel pa infrastruktura a haña, despues ku e simannan ku a pasa inspektornan hulandes a bishitá e inspekshonnan di aviashon di Aruba i Kòrsou.

“Nan a bini ku un rapòrt masha krítiko, e fail di Kòrsou tabata mas krítiko ku esun di Aruba. E situashon na Kòrsou ta masha preokupante si ta trata di vigilansia di seguridat di aviashon i tambe e situashon na InselAir mes.”

serka e inspekshon di aviashon na Kòrsou e situashon ta masha preokupante, sekretario di estado Sharon Dijksma ta bisa – potrèt: Sharina Henriquez

E diferensha ta ku e inspekshon arubano a aktua, Dijksma ta bisa. “E avionnan di InselAir aktualmente no ta bula, ke men inspekshon aki ta hasi su trabou. Pasobra aparentemente nan a konstatá ku no tabata responsabel pa laga e avionnan ei bai laira.”

Riba e pregunta si e avionnan di InselAir na Kòrsou ku ainda ta bula si ta seif, awor ku a sali ku inspekshon ei ta faya, e ta bisa: “Mi no ta haña ku e supervishon di e avionnan ta sufisientemente bon i ku esei bo no por garantisá 100 porshento loke bo ke, esta ku bo ta hasi tur loke bo por pa laga tur kos ta mas seif posibel.”

Gobièrnu hulandes a saka un prohibishon pa bula pa ámtenar hulandes. Pero pa motibu di falta di informashon, Dijksma ta bisa, el a haña ku ‘ta bai muchu leu pa saka un prohibishon pa bula pa tur hende.’